Read Iloko Psalms 7 Bible Online

Psalms 7 - Iloko bible

Psalms 7

¹O Apo a Diosko, kenka agkamangak; isalakannak kadagiti amin a kumamkamat kaniak,

²amangan no kasda la leon a mangipanaw kaniak, ket iti lugar nga awan mangisalakan, lasanglasangendak.

³O Apo a Diosko, no adda nakabasolak; no adda gayyemko a liniputak, wenno adda kabusor nga awan gapuna a rinanggasak, no adda inaramidko kadagitoy—

⁵kamatendak koma dagiti kabusorko ket tiliwendak, rangrangkayen ken papatayendak, ket panawandak iti daga a nakapasagak!

⁶Tumakderka iti ungetmo, O Apo, ket sarangtem ti pungtot dagiti kabusorko! Agriingka ket tulongannak, O Diosko, ket ipaaymo ti hustisia nga inkeddengmo.

⁷Urnongem dagiti amin a tattao iti likmutmo, ket iturayam ida manipud ngato.

⁸Sika ti mangukom iti sangkataoan. Yetnagmo kaniak, O Apo, ti pangngeddengmo, ta pagaammom nga awan basolko.

⁹Pagsardengem ti kinadakes dagiti nakillo, ket dawatek a gunggonaam dagiti naimbag a tattao. Nalintegka, O Dios; usigem dagiti panunot ken tarigagaymi.

¹⁰Ti Dios ti kalasagko; isalakanna dagiti agtulnog kenkuana.

¹¹Ti Dios nalinteg a hues, ukomenna nga ukomen dagiti managdakdakes.

¹²No dida baliwan dagiti dalanda, asaen ti Dios ti kampilanna. Isaganana ti bai ti panana.

¹³Alaenna dagiti natatadem nga igamna, ket ipaturongna ti sumsumged a panana.

¹⁴Kitaem no kasano ti panagpanunot ti dakes a tao; planoenna ti riribuk, aramidenna ti kinaulbod.

¹⁵Ngem ti palab-og nga inaramidna, isu met laeng ti pakatnaganna!

¹⁶Madusa gapu met laeng iti kinadakesna; madangran gapu met laeng iti kinaranggasna.

¹⁷Agyamanak iti Apo gapu iti kinalintegna, Agkantaak kadagiti pagdaydayaw iti Apo a Kangatoan.