Read Iloko Psalms 71 Bible Online

Psalms 71 - Iloko bible

Psalms 71

¹Immayak, O Apo, a pasalakniban iti sidongmo; dimo kadi ipalubos ti pannakaparmekko!

²Gapu ta nalintegka, tulongan ken alawennak! Wen, ipangag ken isalakannak!

³Sika koma ti natalged a bato a pagkamangak, natibker a sarikedked a mangsalaknib kaniak; ta sika ti kamangko, sika ti salinongko.

⁴Ispalennak, O Dios, iti pannakabalin dagiti nadangkes; ispalennak iti ima dagiti nadawel ken managdakdakes.

⁵Sika, O Apo Dios, ti ayan ti namnamak, manipud kinaubingko, sikan ti nagtalkak.

⁶Sika ti nagtaklinak iti unos ti panagbiagko; sinalaknibannak manipud pannakayanakko. Idaydayawka iti amin a tiempo!

⁷Kadagiti adu a tattao, nagbalin a pagtuladan ti biagko, ta sika ti natibker a salaknibko.

⁸Agmalmalem a sarsaritaek ti pannakaidaydayawmo, ket ipadpaduyakyakko ti kinadayagmo.

⁹Dinak kadi laksiden ita ta lakayakon; dinak kadi baybay-an ita ta nakapuyakon!

¹⁰Kayat dagiti kabusorko a patayendak ket pagsasaritaanda ti panangisikatda kaniak.

¹¹Kunada, “Binaybay-anen ti Dios; intay kamaten ken tiliwen, ta awanen ti mangarayat kenkuana!”

¹²O Dios, dinak koma adaywan! Darasem, Diosko, ket umaynak tulongan!

¹³Maibabain ken madadael koma dagiti mangdarup kaniak! Malalais ken maparmek koma dagiti agpanggep a mangdangran kaniak!

¹⁴Kanayon a mangnamnamaak kenka; ket ad-addanto pay nga idaydayawka.

¹⁵Saritaekto ti kinaimbagmo; sawekto nga agmalmalem ti panangisalakanmo, adunto pay laeng ti diak maawatan.

¹⁶Idaydayawkonto ti pannakabalinmo, O Apo Dios; ipakaammokto ti kinalintegmo, wen, ti laeng kinalintegmo.

¹⁷Insuronak, O Dios, manipud pay kinaubingko, ket agpapan ita, sarsaritaek pay laeng dagiti nakaskasdaaw nga aramidmo.

¹⁸Itan, ta lakayakon nga ub-ubanan, O Dios, dinak kadi baybay-an, tapno ti bileg ken pannakabalinmo ipakaammok kadagiti sumarsaruno a kaputotan.

¹⁹Dumanon sadi langit, ti kinalintegmo, naindaklan a bambanag dagiti inaramidmo. Awanen ti kas kenka; O Dios.

²⁰Riribuk ken rigat ti impalak-ammo kaniak, ngem isublimto met laeng ti pigsak; manipud iti tanem aonennak.

²¹Ad-adda pay a kinatan-ok ti ipaaymo kaniak kasta met ti pannakaliwliwak.

²²O Diosko, agarpaakto a mangidaydayaw kenka gapu iti kinapudnom nga awan patinggana. Sika a Santo ti Israel, idaydayawka iti panagtokarko iti lira.

²³Bayat ti panagtokarko, agpukkawakto a siraragsak; agkantaakto a buyogan ti amin a kararuak, agsipud ta insalakannak.

²⁴Agmalmalemto a saritaek a nalintegka ta dagiti agpanggep a mangranggas kaniak nalalais ken naparmekda.