Read Iloko Psalms 72 Bible Online

Psalms 72 - Iloko bible

Psalms 72

¹O Dios, isurom ti ari a mangukom nga awan idumdumana; ibingayam kadi iti hustisia nga adda kenka

²tapno napudno ti panangiturayna kadagiti tattaom, ket uray dagiti maidadanes mairupirda ti kalinteganda.

³Rumang-ay koma ti daga ket aglablabonan; agturay koma ti kinalinteg iti daytoy a pagilian.

⁴Iti panangukom ti ari, kitaenna koma a dagiti napanglaw maikkanda iti hustisia; dagiti marigrigat, tulonganna, ket parmekenna dagiti mangirurumen kadakuada.

⁵Agdaydayaw koma kenka dagiti tattaom iti awan patinggana, kas ti panagpaut ti init ken ti bulan iti ayanda.

⁶Arig koma ti ari iti tudo nga agtinnag iti tay-ak, kas arbis a mangsibog iti daga a natikag.

⁷Agari koma ti kinalinteg bayat ti panagbiagna, adda koma rang-ay agingga nga awanen ti bulan.

⁸Lumawanto ti pagturayanna agingga iti ballasiw ti taaw, manipud Karayan Eufrates dumanonto iti ungto ti daga.

⁹Dagiti tattao ti let-ang agrukbabdanto kenkuana, mapasagto iti tapok dagiti kabusorna.

¹⁰Umayto dagiti ari ti Tarsis ken dagiti purpuro ket itedda ti sagutda; yegto dagiti ari ti Sheba ken Seba ti datonda.

¹¹Agrukbabto dagiti amin nga ari kenkuana, agserbinto kenkuana dagiti amin a pagilian.

¹²Arayatenna ti napanglaw nga umawag kenkuana, kasta met dagiti makasapul ken nabaybay-an tulonganna ida.

¹³Naasi kadagiti nakurapay ken nakapuy; isalakanna ti biag dagiti makasapul.

¹⁴Ispalenna ida iti pannakaidadanes ken kinaranggas; ispalenna ida ta napateg kenkuana ti biagda.

¹⁵Agbiag koma ti ari iti agnanayon! Maikkan koma iti balitok ti Seba. Kanayon koma ti pannakaikarkararagna. Kanayon koma a maited ti bendision ti Dios kenkuana.

¹⁶Umadu koma ti apit iti daga, makumotan koma dagiti turod iti mula kas kabunga dagiti adda idiay Libano. Umadu koma dagiti tattao kadagiti siudad, a kas iti kaadu ti ruruot iti tay-ak.

¹⁷Pulos a dinto koma malipatan ti naganna; agpaut koma a kas iti init ti kinalatakna. Agdaydayaw koma dagiti amin a nasion kenkuana; dawatenda koma a bendisionan ti Dios ida a kas iti pannakabendision ti ari.

¹⁸Idaydayawyo ti Apo, ti Dios ti Israel! Isu laeng ti makaaramid kadagitoy nakaskasdaaw a banag!

¹⁹Idaydayawyo iti agnanayon ti nagloriaan a naganna; ket mapno koma ti sangalubongan iti dayagna! Amen! Amen!

²⁰Daytoy ti paggibusan dagiti kararag ni David nga anak ni Jesse.