Read Iloko Psalms 73 Bible Online

Psalms 73 - Iloko bible

Psalms 73

¹Pudno unay a naimbag ti Dios iti Israel! Naimbag kadagiti nadalus ti panagpuspusona!

²Ngem nagistayanak naitibkol, dandaniak naikaglis

³ta inapalak ti nakitak nga irarang-ay dagiti managdakdakes ken dagiti natangsit.

⁴Awan tuok a sagabaenda; napigsa ken nasalun-atda.

⁵Dida agsagaba a kas kadagiti dadduma; awan ti parikutda a bakbaklayenda a kas kadagiti sabali a tattao.

⁶Kinatangsit ngarud ti pannakakuentasda, ket kinaranggas ti pannakakawesda.

⁷Dakes ti agtaud iti pusoda, kinikillo ti linaon ti panunotda.

⁸Pagang-angawanda dagiti tattao ket dakes a bambanag ti saoda; natangsitda ket agplanoda iti panangidadanesda.

⁹Padpadaksenda ti Dios sadi langit; ditoy daga, agbilinda a sitatangsit.

¹⁰Uray dagiti tattao ti Dios sumurotda kadakuada, ket sigagagarda a mamati iti amin a saoda.

¹¹Ipagarupda a dinto maammoan ti Dios ti aramidda, ket ti Kangatoan dinanto matakuatan ida.

¹²Kasta ti kasasaad dagiti managdakdakes; aglablabonanda ket ad-adu pay ti urnongenda.

¹³Awan kadi ti serserbina a nagtalinaedak a nadalus ken nalinteg?

¹⁴O Dios, agmalmalem nga agsagsagabaak, ket binigat a dusdusaennak.

¹⁵No sinaok koma ti kasta, saanak a napudno kadagiti tattaom.

¹⁶Inkagumaak nga ammirisen ti kaipapananda uray no narigatko nga awaten

¹⁷agingga a simrekak iti Templom ket naammoak ti pagtungpalan dagiti managdakdakes.

¹⁸Pudno nga ipanmo ida iti nagalis a disso tapno matnagda iti awan duadua a pakadadaelanda.

¹⁹Apagdarikmat ti pannakaikisapda; nakabutbuteng ti paggibusanda.

²⁰Kasda la tagtagainep nga agpukaw iti agsapa; no agriingka, O Apo, umsiem ti langada.

²¹Idi napasakitanak ket nasugatan toy riknak,

²²arigko iti nakuneng nga animal ket saanka a naawatan.

²³Nupay kasta, kanayon nga addaak iti arpadmo ket kibkibinennak.

²⁴Idaldalannak, babaen kadagiti pamagbagam ket iti kamaudiananna, awatennak babaen iti pammadayaw.

²⁵Adda aya masarakak sadi langit a kas kenka? Yantangay ta addaka kaniak, adda aya sabali a kayatko ditoy daga?

²⁶No agkapuy toy puso ken riknak, ti Dios ti mangpakired kaniak. Isu laeng ti agnanayon a masapulko.

²⁷Awan duadua a matayto dagiti mangtallikud kenka, ket dagiti saan a napudno kenka, pukawemto ida.

²⁸Ngem ti kaaddak iti asidegmo ti ragsakko. Apo Dios, nagbalinka a natalged a kamangko tapno ipakaammok ti amin nga aramidmo.