Read Iloko Psalms 74 Bible Online

Psalms 74 - Iloko bible

Psalms 74

¹Diosko, apay a linaksidnakami a namimpinsan? Agnanayon kadi ti pungtotmo iti arbanmo?

²Laglagipem dagiti tattaom a pinilim idi un-unana, dagiti sinubbotmo nga agbalin a kukua. Laglagipem ti Bantay Sion a taengmo.

³Magnaka kadagitoy rebba iti agnanayon awan inggana; amin nga adda iti Templo dinadael dagiti kabusor.

⁴Iti uneg ti nasantoan a Templom, nagdir-i dagiti kabusormo iti panagballigida; inkabilda sadiay dagiti bandera ti panangabakda.

⁵Kasda la agpukpukan iti kayo babaen iti wasayda.

⁶Amin a nakitikitan a kayo dinadaelda babaen iti wasay ken maso.

⁷Rinakrakda ti Templom ket pinuoranda. Tinulawanda ti lugar a pagdaydayawan kenka.

⁸Inkeddengda nga ikisapdakami a padapada; pinadapuda amin a nasantoan a paguummongan iti daga.

⁹Awanen dagiti milagro a makitami; awanen dagiti profeta. No kaano nga aggibus ti agdama a kasasaadmi, awan ti makaammo kadakami.

¹⁰Kasano kabayag, O Dios, a katkatawaandakami dagiti kabusormi? Agnanayon kadi a lalaisenda ti naganmo?

¹¹Apay a saannakami a tulongan? Apay a nakadalikepkepka lattan?

¹²Ngem sika, O Dios, ti arimi manipud ugma; namin-adu a nagballigika ditoy daga.

¹³Babaen iti bilegmo, binisngaymo ti baybay, ket binurakmo dagiti ulo ti dragon iti taaw.

¹⁴Rinumekmo dagiti ulo ti dragon a maaw-awagan Leviatan ket impakanmo ti bangkayna kadagiti parsua iti let-ang.

¹⁵Pinagpussuakmo dagiti ubbog ken waig; pinagmagam dagiti dadakkel a karayan.

¹⁶Pinarsuam ti aldaw ken rabii, ti init ken bulan.

¹⁷Dagiti beddeng ti daga, sika ti nangipasdek; intuyangmo ti tiempo ti pudot ken tiempo ti lam-ek.

¹⁸Laglagipem, O Apo, nga ang-angawendaka dagiti kabusormo; maagda ket agsaoda iti maibusor iti naganmo.

¹⁹Dimo baybay-an dagiti tattaom nga awan gawayna; maidaddanesda, dimo koma liplipaten ida.

²⁰Laglagipem ti tulagmo kadakami, ta nagsaknapen ti kinadawel ken kinaranggas kadagiti nasipnget a lugar ti daga.

²¹Dimo ipalubos a maibabain dagiti napanglaw ken nanumo; idaydayawdaka koma dagiti mailupitlupit a tattao.

²²Bumangonka, O Dios, ket irupirmo ti kalintegam. Laglagipem nga agmalmalem a katkatawaandaka dagiti awan diosna.

²³Dimo lipaten dagiti makapungtot nga ikkis dagiti kabusormo, ti di agsarday a panagririaw dagiti sumupring kenka.