Read Iloko Psalms 76 Bible Online

Psalms 76 - Iloko bible

Psalms 76

¹Nalatak ti Dios idiay Juda; idiay Israel, madaydayaw ti naganna.

²Adda idiay Salem ti balayna; idiay Sion ti pagnanaedanna.

³Sadiay tinukkolna dagiti pana dagiti kabusor, dagiti kalasag ken kampilanda— wen, amin nga armasda.

⁴O Dios, anian a dayagmo, anian a daeg ti panagsublim. Naggapuka kadagiti bambantay a nangparmekam kadagiti kabusormo.

⁵Naagawen dagiti sinamsam dagiti natured a mannakigubatda; matmaturogdan iti turog ni patay; awanen ti mangusar kadagiti armasda.

⁶Idi nakapungtotka, O Dios ni Jacob, napasag dagiti kabalio ken dagiti nagsakay.

⁷Ngem sika, O Apo, pagbutbutngandaka! Siasino ti makaitured a tumakder iti sangoanam no agpungtotka?

⁸Manipud langit, impaulogmo ti sentensia; nagbuteng ti daga ket adda kappia,

⁹idi tumakderka a mangukom tapno isalakanmo dagiti maidaddadanes ditoy daga.

¹⁰Ti pungtot ti tao agbanag la a pakaidayawam; ket dagiti nakalasat ngilinendanto dagiti fiestam.

¹¹Tungpalenyo dagiti kariyo iti Apo a Diosyo. Rebbeng dagiti tattao nga ipan dagiti sagutda kenkuana, isu a pagbutngan dagiti tattao.

¹²Pagpakumbabaenna dagiti natangsit a prinsipe, ket butbutngenna dagiti ari.