Read Iloko Psalms 77 Bible Online

Psalms 77 - Iloko bible

Psalms 77

¹Yikkisko ti umasug iti Dios, ipigsak ti umawag ket denggennak.

²Agkararagak iti Apo iti tiempo ti pannakariribukko; agpatpatnag nga agkararagak a singangato dagiti imak ngem awan pannakaliwliwak.

³Lagipek ti Dios ket agasugak; agammirisak ket maupayak.

⁴Dina ipalubos a maalak ti turogko, kasta unay ti danagko ket diak makasao.

⁵Mapanunotko dagiti naikupin a panawen; malagipko met dagiti limmabasen a tawen.

⁶Agpatpatnag a nauneg dagiti pampanunotko; agpampanunotak ket saludsodek itoy nakemko:

⁷“Kanayonto la ngatan a ti Apo laksidennak? Saanto ngata a mangaasi manen kaniak?

⁸Limmammiis ngatan ti di agbalbaliw nga ayatna? Saanna ngatan a tungpalen ti karina?

⁹Nagpatingga ngatan ti kinamanagparaburna? Pungtot kadin ti simmukat iti kinamanangngaasina?”

¹⁰Ket kinunak, “Daytoy ti pagsakitan ti nakemko: ti pannakabalin ti Dios, saanen a kas idi damo.”

¹¹Dagiti aramidmo, O Apo, laglagipekto ida, wen, dagiti impakitam a milagro idi un-unana.

¹²Lagipekto dagiti amin a gapuanam; utobekto dagiti aramidmo a naindaklan.

¹³O Dios, nasantoan amin a gapuanam! Awan dios a kas kenka a naindaklan.

¹⁴Sika ti Dios nga agaramid kadagiti milagro; impakitam kadagiti nasion ti bilegmo.

¹⁵Babaen iti bilegmo, sinubbotmo dagiti bukodmo a tattao, dagiti kaputotan da Jacob ken Jose.

¹⁶Nakitadaka dagiti danum, O Dios, ket nagbutengda; uray dagiti kaadalman a taaw nagpigergerda.

¹⁷Imbuyat dagiti ulep ti tudo; naggurruod iti tangatang ket nagkimat iti agsasallupang.

¹⁸Agallangogan ti uni ti gurruodmo, ket ti lubong malawagan kadagiti kimatmo; nagkintayeg ken nagpigerger ti daga.

¹⁹Nagnaka iti baybay; ti adalem a taaw binallasiwmo, ngem saan a makita dagiti tugotmo.

²⁰Arigmo iti pastor a nangidalan kadagiti tattaom, babaen iti panangidaulo da Moises ken Aaron.