Read Iloko Psalms 78 Bible Online

Psalms 78 - Iloko bible

Psalms 78

¹Dakayo a tattaok, dumngegkay iti daytoy pannursurok, ket ipamaysayo nga allingagen ti innak isao.

²Pangngarig ti innak aramaten; ilawlawagko dagiti palimed idi ugma,

³dagiti nangngeg ken naammoantayo nga imbaga dagidi ammatayo.

⁴Ditay ilimlimed ida kadagiti annaktayo, no di ket isaritatayo kadagiti kaputotan a sumarsaruno ti pannakabalin ken naindaklan a gapuanan ti Apo, agraman dagiti nakaskasdaaw nga aramidna.

⁵Nangituyang iti linteg kadagiti Israelita; nangipaulog iti bilin kadagiti kaputotan ni Jacob. Imbilinna kadagiti kapuonantayo nga isuroda dagitoy kadagiti annakda

⁶tapno maammoan dagiti sumarsaruno a kaputotan a di pay nayanak, ket isurodanto met kadagiti bukodda nga annak.

⁷Iti kasta, agtalekda met iti Dios, ket dida lipaten dagiti aramidna no di ket kanayon a tungpalenda dagiti bilbilinna.

⁸Saanda koma a kas kadagiti kapuonanda a nasukir ken nasubeg a kaputotan. Saan a natibker ti pammatida iti Dios, ket saanda a nagtalinaed a napudno kenkuana.

⁹Nagtagipana dagiti Efraimita, ngem iti kaaldawan ti gubat, nagtatarayda.

¹⁰Saanda a tinungpal ti katulagan ti Dios, saanda a nagbiag a mayannurot iti lintegna.

¹¹Nalipatanda dagiti inaramidna, dagiti milagro nga impakitana kadakuada.

¹²Iti imatang dagiti kapuonanda nagaramid kadagiti milagro, iti tanap ti Soan idiay Egipto.

¹³Pinagbisngayna ti baybay ket inlasatna ida; pinagpangatona ti danum a kas pader bayat ti pannagnada.

¹⁴Iti aldaw, babaen iti ulep indalanna ida iti rabii, ti naraniag nga apuy ti bagnosda.

¹⁵Pinagrengngatna ti dakkel a bato idiay let-ang imminumda iti danum a kasla nagburayok manipud kaunggan.

¹⁶Pinagubbogna ti dakkel a bato ket nagayus ti danum a kasla karayan.

¹⁷Ngem, nagbasolda latta iti Dios, ket binusorda ti Kangatoan idiay let-ang.

¹⁸Inggagarada a sinuot ti anus ti Dios babaen iti panagdawatda iti taraon a magustoanda.

¹⁹Nagsaoda iti maibusor iti Dios ket kinunada, “Maikkannatayo ngata ti Dios iti taraon ditoy let-ang?

²⁰Agpayso a dinugsolna ti dakkel a bato ket pimsuak ti danum a nagayus a kasla karayan. Ngem maikkannatayo ngata iti tinapay ken karne?”

²¹Nakapungtot ni Yahweh idi nangngegna daytoy; dinusana dagiti tattaona babaen iti apuy, ket rimmubrob ti pungtotna kadakuada,

²²agsipud ta awan ti panagtalekda iti Dios, ken awan pammatida a maisalakanna ida.

²³Nupay kasta, binilinna ti tangatang ket linuktanna dagiti ruangan ti langit.

²⁴Pinagtudona kadakuada iti mana a kanenda, wen, ti mana a nagtaud sadi langit.

²⁵Nanganda iti taraon dagiti anghel; inted ti Dios ti aglaplapusanan a kanenda.

²⁶Binulosanna ti angin nga aggapu iti daya ket babaen iti pannakabalinna, dimteng ti angin-abagat.

²⁷Intedna ti adu a tumatayab kadakuada a kas kaadu ti darat iti baybay.

²⁸Nagtinnagda iti tengnga ti kampoda ken iti aglikmut dagiti toldada.

²⁹Nangan dagiti tattao ket nabsogda, ta intedna ti taraon a kayatda.

³⁰Ngem idi mangmanganda pay laeng, ken saanda pay a natilmon ti kanenda,

³¹nakapungtot ti Dios kadakuada ket pinatayna dagiti maingel iti Israel ken dagiti kapipigsaan nga agtutuboda.

³²Iti laksid dagitoy, intuloy dagiti tattao ti panagbasolda; adu a milagro ti inaramidna, dida nagtalek kenkuana.

³³Ngarud, kasla anges ti kaababa ti aldawda, ginudasna ida iti kellaat a didigra.

³⁴Tunggal adda dagiti papatayenna kadakuada, isu metten ti panagbirok kenkuana dagiti dadduma, agbabawida ket sipapasnekda nga agkararag kenkuana.

³⁵Malagipda a ti Dios isut' bato a salaknibda; ti Kangatoan ti mangisalakan kadakuada.

³⁶Ngem pasig nga ulbod ti sasawenda, saan a naimpusoan amin nga ibagbagada.

³⁷Dida nagtalinaed a napudno kenkuana, ket dida tinungpal ti nagtutulaganda.

³⁸Nupay kasta, kinaasian ti Dios dagiti tattaona, pinakawanna dagiti basolda ket dina pinukaw ida. Namin-adu a tinengngelna ti ungetna ken minedmedanna ti pungtotna.

³⁹Nalagipna a tattaoda laeng, kas angin a lumabas a di agsublin.

⁴⁰Namin-adu a nagsukirda iti Dios idiay let-ang! Masansan met a pagladingitenda.

⁴¹Masansan a suotenda ti kinaanusna. Saem ti impalak-amda iti Nasantoan ti Israel.

⁴²Nalipatanda ti dakkel a pannakabalinna idi inispalna ida iti kabusorda,

⁴³idi inaramidna dagiti milagro ken nakaskasdaaw a pagilasinan, ken ti aldaw nga adda idiay Egipto iti tanap ti Soan.

⁴⁴Pinagbalinna a dara dagiti karayan ken waig dagiti Egipcio; naawanan dagiti Egipcio iti danum nga inumen.

⁴⁵Nangibaon iti pinangen a ngilaw a namarigat kadakuada; nangyeg kadagiti tukak a nangdadael kadagiti talonda;

⁴⁶nangibaon kadagiti arabas a nangan kadagiti apitda ken dudon a nangdadael kadagiti mulada.

⁴⁷Dinadaelna dagiti ubasda babaen iti yelo, inkisapna dagiti sikamoro iti bumayakabak a tudo.

⁴⁸Pinatayna dagiti bakada babaen iti yelo; inkisapna dagiti karneroda babaen iti kimat.

⁴⁹Bimtak ti pungtot ken ungetna; inyegna kadakuada ti nakaro a didigra a dimteng a kas babaonen ni patay.

⁵⁰Saanna nga inggawid ti pungtotna wenno inkaluya ida iti pakatayanda no di ket pinatayna ida iti didigra.

⁵¹Pinatayna dagiti inauna nga annak a lallaki, iti amin a familia ti Egipto.

⁵²Kasla karnero nga inakayna dagiti tattaona; indalanna ida a naglasat iti let-ang.

⁵³Indalanna ida a sitatalged ket awan nagbutnganda, ngem nalmes iti baybay dagiti kabusorda.

⁵⁴Impanna ida iti nasantoan a dagana, kadagiti kabambantayan a sinakupna.

⁵⁵Pinapanawna dagiti agnaed iti daga a papananda sana biningbingay ti dagada kadagiti tribu ti Israel ket intedna dagiti balbalayda kadagiti tattaona.

⁵⁶Ngem ti Mannakabalin-amin a Dios, sinukirda; saanda a tinungpal dagiti bilbilinna.

⁵⁷Nasukir ken mangliliputda a kas kadagiti kapuonanda; saanda a maiturong a kas iti killo a pana.

⁵⁸Pinagpungtotda gapu kadagiti altarda ket pinagimonda gapu iti didiosen a nagdaydayawanda.

⁵⁹Nagpungtot ti Dios idi makitana daytoy ket linaksidna a namimpinsan ti Israel.

⁶⁰Binaybay-anna ti toldana idiay Silo a nagnaedanna iti sidong dagiti tattao.

⁶¹Pinalubosanna dagiti kabusor a mangsamsam, iti Lakasa ti Tulag a pakakitaan iti bileg ken dayagna.

⁶²Kinapungtotna dagiti bukodna a tattao, binaybay-anna ida a pinapatay dagiti kabusorda.

⁶³Napasag iti paggugubatan dagiti agtutuboda, ket awan ti nangasawa kadagiti babbalasangda.

⁶⁴Nauloyan iti kampilan dagiti papadida, ket di napalubosan nga agdung-aw dagiti baloda.

⁶⁵Kamaudiananna, bimmangon ti Apo a kasla nakaturog; kasla napigsa a lalaki a pinatured ti arak.

⁶⁶Pinaksiatna dagiti kabusorna; agnanayon ken nakababain ti pannakaabakda.

⁶⁷Ngem linaksidna dagiti kaputotan ni Jose saanna a pinili ti tribu ni Efraim.

⁶⁸Pinilina ketdi ti tribu ni Juda ken ti Bantay Sion nga ay-ayatenna.

⁶⁹Binangonna sadiay ti Templona nga umasping iti taengna sadi langit; impasdekna a di maisin a kas iti daga, natalged ingganat' inggana.

⁷⁰Pinilina ni David nga agbalin nga adipenna, innalana iti pagpastoran kadagiti karnero

⁷¹ken pagtaraknan kadagiti urbon. Pinagbalinna nga ari ti Israel, ken pastor dagiti tattao ti Dios.

⁷²Iti kasta, sipapasnek nga inaywanan ni David ida, ket nainsiriban ti panangipangulona kadakuada.