Read Iloko Psalms 79 Bible Online

Psalms 79 - Iloko bible

Psalms 79

¹O Dios, rinaut dagiti pagano ti daga dagiti tattaom. Tinulawanda ti nasantoan a Templom. Ket rinebbekda ti Jerusalem.

²Impakanda ti bangkay dagiti tattaom kadagiti tumatayab, ken ti bangkay dagiti adipenmo kadagiti animal nga atap.

³Pinagayusda ti dara dagiti tattao iti Jerusalem; iti entero a Jerusalem kasla danum a nagayus ti dara ket awan natda a mangitabon kadakuada.

⁴Nagbalinkami nga ang-angaw kadagiti nasion iti likmutmi, katkatawaan ken um-umsiendakami.

⁵Agnanayon kadi, O Apo, ti ungetmo kadakami; kasla apuy a simged ti pungtotmo, saan kadin a maiddep?

⁶Idissuormo ti pungtotmo kadagiti nasion a pagano, dida agdaydayaw kenka, dida umawag iti naganmo.

⁷Ngamin, pinapatayda dagiti tattaom; dinadaelda ti pagiliam ket naglangalang.

⁸Dinakam kadi dusaen gapu iti basol dagiti kapuonanmi. Darasem ti umay ket kaasiannakami ta napukawmi aminen a namnamami.

⁹Tulongannakam, O Dios ket isalakannakami; ispalennakami ket pakawanem dagiti basbasolmi tapno ti dayawmo maitandudo.

¹⁰Amangan ketdi no kuna dagiti pagilian, “Sadino ti ayan ti Diosda?” Kayatmi a makita ti panangdusam kadakuada gapu iti pannakapapatay dagiti adipenmo.

¹¹Denggem ti asug dagiti balud, ket wayawayaam dagiti naikeddeng a matay babaen iti bilegmo a naindaklan.

¹²O Apo, balsem dagiti pagilian; dusaem ida iti mamimpito gapu iti amin a panangumsida kenka.

¹³Dakami a tattaom, dakami a karnero iti arbanmo, agnanayon nga agyamankamto kenka, ket idaydayawdakanto iti amin a tiempo.