Read Iloko Psalms 80 Bible Online

Psalms 80 - Iloko bible

Psalms 80

¹Ipangagnakami kadi, O Pastor ti Israel; denggennakami, sika a mangidaldalan iti arbanmo. Sika a situtugaw iti tronom iti rabaw dagiti kerubim,

²ipakitam ti ayatmo kadagiti tribu ti Efraim, Benjamin ken Manases. Ipakitam kadi ti pigsam kadakami; umaynakami kadi isalakan!

³Isublinakami kadi, O Dios. Iparangarangmo ti panagayatmo tapno maisalakannakami!

⁴O Apo a Dios a Mannakabalin-amin, kasano pay kabayag nga agtalinaed ti pungtotmo kadakami? Kasano pay kabayag samonto ipangag dagiti kararagmi?

⁵Tinaraonannakam iti lua, adu a lua ti impainummo kadakami.

⁶Pinalubosam dagiti nasion a mangumsi kadakami ket pagang-angawandakami.

⁷O Mannakabalin-amin a Dios, isublinakami kadi. Ipakitam ti asim tapno maisalakannakami.

⁸Maysa nga ubas ti inruarmo idiay Egipto; pinaksiatmo dagiti sabsabali a nasion ket immulam iti dagada.

⁹Dinalusam ti maysa a disso a pakaimulaanna, nagpauneg dagiti ramutna. Dimmakkel ti ubas ket nagsaknap iti entero a daga.

¹⁰Lininonganna dagiti turod, ken dagiti natayag a sedro.

¹¹Dimmanon dagiti sangana iti Taaw Mediterranean; rimmungbo agingga iti nakadanon iti Karayan.

¹²Apay a rinebbam dagiti aladna? Nawayan dagiti aglabas a mangpuros iti bungana.

¹³Subsoben ken baddebaddekan dagiti alingo, dagiti atap nga animal, sumrekdan nga agkaan.

¹⁴Kaasiannakami, O Mannakabalin-amin a Dios. Tannawagannakami manipud langit ket umaymo salakniban toy kaubasam.

¹⁵Umaymo ispalen daytoy mula nga intukitmo, daytoy naganus nga ubas a pinadakkelmo a nalangto.

¹⁶Pinuoran dagiti kabusormi ket pinukanda; ket iti pungtotmo, dadaelem ida.

¹⁷Dagiti tattao a pinilim, taginayonen ken salaknibam. Ti pinapigsam a nasion inka salakniban.

¹⁸Saandakanton a panawan; taginayonennakami ket idaydayawdaka.

¹⁹O Apo a Dios a Mannakabalin-amin, isublinakami kadi. Iparangarangmo ti panagayatmo tapno maisalakankami.