Read Iloko Psalms 81 Bible Online

Psalms 81 - Iloko bible

Psalms 81

¹Idir-iyo ti ragsakyo iti Dios a salaknibtayo; iti Dios ni Jacob ikantayo ti pagdayawyo.

²Agkantakayo a buyogan iti pandereta, danggayanyo iti naaweng a lira ken arpa.

³Pagunienyo ti trumpeta no agfiestatayo, tunggal dumteng ti lutuad, kasta met ti kabus.

⁴Ta iti Israel, linteg daytoy a naipaulog, maysa a bilin ti Dios ni Jacob.

⁵Imbilinna ken Jose daytoy nga annongen idi mapan Egipto nga inna gubaten. Mangngegko ti timek ti diak am-ammo,

⁶“Inikkatko ti nadagsen nga awit iti abagam; innalak ti basket nga ig-iggamam.

⁷Idi adda rigatmo, immawagka kaniak ket inlisika; manipud gurruod a paglemlemmengak, sinungbatanka, sinuotka idi addaka iti ubbog ti Meriba.

⁸Denggem, O ilik, ti ballaagko kenka. O Israel, ipangagnak la koma!

⁹Awanto ti sabali a dios iti nagtengngaanyo, wen, saankayto nga agrukbab iti sabali a dios.

¹⁰Siak ni Yahweh a Diosmo a nangiruar kenka idiay Egipto; agngangaka laeng ket itedko ti taraonmo.

¹¹“Ngem didak impangag dagiti tattaok; saan a nagtulnog kaniak ti Israel.

¹²Gapu iti kinasukirda binaybay-ak ida nga agaramid iti aniaman a kayatda.

¹³No dumngeg la koma kaniak ti ilik, no agtulnog ti Israel kaniak,

¹⁴nalaka a parmekek dagiti kabusorna, ket abakek amin a bumusor kenkuana.

¹⁵Agrukbab a sibubuteng dagiti gumurgura kaniak, ket saan nga agpatingga ti pannakadusada.

¹⁶Ngem taraonankanto iti kasayaatan a trigo, ket pennekenkanto iti kasam-itan a diro.”