Read Iloko Psalms 83 Bible Online

Psalms 83 - Iloko bible

Psalms 83

¹O Dios, agtignayka kadin; dika kadi agulimek, dika agmayeng.

²Kitaem ket umalsan dagiti kabusormo, makigubaten dagiti gumurgura kenka.

³Adda nalimed a panggepda kadagiti tattaom, isikatda dagiti salsalaknibam.

⁴“Umaykayo,” kunada, “ket dadaelentayo ti nasionda, tapno mapukawen ti Israel, malipatanen ti naganna.”

⁵Nagtutulagda a sangsangkamaysada a mangbusor kenka:

⁶dagiti Edomita ken dagiti Ismaelita, dagiti Moabita ken dagiti Agareno;

⁷dagiti taga-Gebal, Ammon ken Amalec; ken dagiti taga-Filistia ken Tiro.

⁸Timmipon met kadakuada ti Asiria tapno dagiti kaputotan ni Lot kaduaenda.

⁹Ipalak-ammo kadakuada ti impaaymo kadagiti Midianita, kada Sisera ken Jabin iti Karayan Kison.

¹⁰Pinarmekmo ida idiay Endor, ket nagrupsa ti bangkayda iti daga.

¹¹Aramidem kadagiti panguloda ti kas iti inaramidmo kada Oreb ken Zeeb; parmekem dagiti amin nga agtuturayda kas iti panangparmekmo kada Zeba ken Salmunna

¹²isuda a nagkuna, “Tagikuaentayo ti daga ti Dios.”

¹³O Diosko, inwarawaram ida a kas tapok, kas taep nga ipalais ti angin.

¹⁴Kas iti apuy a manguram iti kabakiran, kas iti gil-ayab a mangpasged kadagiti turod,

¹⁵kamatem ngarud ida babaen iti bagiom, ket pagalinggagetem ida babaen iti alipugpogmo.

¹⁶Lapunosem ida iti bain, O Apo, tapno bigbigenda ti pannakabalinmo.

¹⁷Agnanayon koma a maparmek ken mabutbutengda; matayda koma a naan-anay ti pannakaibabainda.

¹⁸Maammoanda koma a siksika laeng ti Apo, Yahweh ti naganmo, ti Kangatoan iti entero a daga.