Read Iloko Psalms 84 Bible Online

Psalms 84 - Iloko bible

Psalms 84

¹Anian a nagpintas ti Templom, O Apo a Mannakabalin-amin!

²Kasta unay ti gagarko a mapan sadiay! Kayatko ti sumrek iti Templo ni Yahweh. Kantaak iti Dios a sibibiag; agkantaak a siraragsak iti amin a puso ken kararuak.

³Agumok dagiti billit ken ti sallapingaw, ket aywananda dagiti sibongda iti asideg dagiti altarmo, O Apo a Mannakabalin-amin, Arik ken Diosko.

⁴Naragsak dagiti agnaed iti balaymo. Kanayon nga agkankantada iti pagdaydayaw kenka.

⁵Naragsak dagiti tattao a sika ti pagtaudan ti pigsada, a mailiw a mapan agdaydayaw idiay Bantay Sion.

⁶Bayat ti panangdaliasatda iti natikag a tanap ti Baca, agburayok dagiti ubbog iti dayta a daga, agtinnag ti nasapa a tudo ket dagiti waig aglipiasda.

⁷Pumigsada a pumigsa bayat ti pannagnada; makitadanto ti Dios dagiti dios idiay Sion.

⁸O Apo a Dios a Mannakabalin-amin, denggem ti kararagko, dumngegka, O Dios ni Jacob.

⁹Bendisionam ti arimi, O Dios, ti ari a pinilim.

¹⁰Naim-imbag ti maysa nga aldaw a kaaddak iti Templom, ngem ti sangaribu nga aldaw iti sabali a disso. Kaykayatko ti agbantay iti ruangan ti balay ti Dios, ngem ti agtaeng iti balay dagiti managdakdakes.

¹¹O Apo ken Diosmi, arigmo iti init ken kalasag; mangipaayka iti parabur ken dayaw. Dimo ipaidam ti nasayaat a banag kadagiti agaramid iti naimbag.

¹²O Apo a Mannakabalin-amin, nagasat ti tao nga agtalek kenka.