Read Iloko Psalms 86 Bible Online

Psalms 86 - Iloko bible

Psalms 86

¹Denggennak kadi, O Apo, ket sungbatannak, ta napanglaw ken awan kabaelak.

²Isalakannak iti patay ta sika ti Diosko; ispalem toy adipenmo nga agtalek kenka.

³O Apo, kaasiannak koma; agmalmalem nga agkararagak kenka.

⁴Paragsakem toy adipenmo, O Apo, ta sika ti pagkararagak.

⁵Naimbag ken mamakawanka, aglaplapusanan ti di agbalbaliw nga ayatmo kadagiti amin nga umawag kenka.

⁶Ipangagmo, O Apo, toy kararagko; denggem toy asugko a dumawat iti tulongmo.

⁷Umawagak kenka iti tiempo ti pannakariribukko, agsipud ta sungbatam toy kararagko.

⁸Awan ti dios a kas kenka, O Apo, awan ti makaaramid iti maaramidmo.

⁹Umayto dagiti amin a nasion a pinarsuam, ket agrukbabdanto iti sangoanam. Idaydayawdanto ti naganmo.

¹⁰Mannakabalinka, ket nakaskasdaaw dagiti aramidmo; siksika laeng ti Dios, awanen sabali.

¹¹Isuronak ti kayatmo nga aramidek, O Apo, ket agtulnogak kenka a sipupudno; isuronak nga agserbi kenka a sipapasnek.

¹²Agyamanak iti amin a pusok, O Apo a Diosko; agnanayon nga ipakaammok ti naganmo.

¹³Nagdakkel ketdin ti panagayatmo kaniak! Iti kaunggan tanem inaonmo toy kararuak.

¹⁴O Dios, umaydak darupen dagiti natangsit a tattao; kayatdak a papatayen ti bunggoy a di kenka mangikankano.

¹⁵Ngem sika, O Apo, naasi ken managayatka a Dios; naparaburka, napudno ken naanus.

¹⁶Taliawennak ket kaasiannak; papigsaen ken isalakannak, ta agserbiak kenka a kas iti inak.

¹⁷Ikkannak, O 0Apo, ti pakakitaan iti kinaimbagmo. Mabainanto dagiti gumurgura kaniak a makakita a liniwliwa ken tinulongannak.