Read Iloko Psalms 88 Bible Online

Psalms 88 - Iloko bible

Psalms 88

¹Agmalmalem nga umaw-awagak, O Apo a Diosko, ket iti rabii, umayak iti saklangmo.

²Ipangagmo koma toy kararagko; denggem toy panagdawatko iti tulongmo.

³Nakaad-adu a rigat ti nagpasarak ket ita asidegakon ken patay.

⁴Naibusanakon iti pigsa; naibilangakon a natay a kas kadagiti dadduma.

⁵Nabaybay-anak iti lugar dagiti natay; kaslaak kadagiti napapatay nga addan iti tanemda, isuda a nalipatamon a namimpinsan, ket saanmo idan a matulongan.

⁶Intapuaknak iti yuyeng ti tanem, iti abut a kasipngetan ken kaunggan.

⁷Agdissuor kaniak ti nakaro a pungtotmo, ket lapunosendak dagiti dalluyonmo.

⁸Inyadayom dagiti gagayyemko kaniak; pinagbalinnak a makarimon kadakuada, ket diak makaruar ditoy nakaipupokak.

⁹Nakapsuten ti panagkitak gapu ti panagsagabak. Kenka, O Apo, inaldaw nga umawagak, agkararagak a silalayag dagiti imak.

¹⁰Agiparangka aya iti milagro kadagiti natay? Bumangonda aya tapno agdaydayawda kenka?

¹¹Iti tanem, saritaenda aya ti napudno nga ayatmo? Iti lugar a pakadadaelan, saritaenda aya ti kinamatalekmo?

¹²Iti kasipngetan, makita aya dagiti karkarna nga aramidmo? Iti daga ni lipat, mabigbig aya ti kinaimbagmo?

¹³O Apo, umawagak a patulongan kenka; agkararagak kenka iti tunggal agsapa.

¹⁴Apay, O Apo, a laksidennak? Apay nga ilingedmo ta rupam kaniak?

¹⁵Kakaasi ken agngangabitak ken patay sipud pay idi ubingak; inibturak dagiti panggugormo ket itan mautoyanak.

¹⁶Ti rungsotmo naglasat kaniak, ket dagiti pangdidigram dinadaeldak.

¹⁷Agmalmalem a kasda la layus a manglawlaw kaniak; linakubdak ket awan ti paglisiak.

¹⁸Uray dagiti nadekket a gagayyem inyadayom kaniak; ti laeng sipnget ti nabati a kaduak.