Read Iloko Psalms 9 Bible Online

Psalms 9 - Iloko bible

Psalms 9

¹Iti amin a pusok, O Apo, agyamanak kenka; amin a nakaskasdaaw nga aramidmo saritaek ida.

²Gapu kenka, agkantaak a sirarag-o. Ikantak, O Kangatoan, ti pagdaydayaw iti naganmo.

³Agsanud dagiti kabusorko no agparangka; mapasagda ket matayda.

⁴Nalinteg ken pudno dagiti pangngeddengmo, ket nainkalintegan ti sentensiak nga impaulogmo.

⁵Dinusam dagiti saan a mamati, dagiti managdakdakes dinadaelmo; saandan a malaglagip uray inton kaano man.

⁶Wen, dagiti kabusor namimpinsan a pinarmekmo, dinadaelmo dagiti siudadda, ket pinukawmo amin a pakalaglagipanda.

⁷Ngem agari ni Yahweh iti agnanayon; insaganana ti tronona a mangukom.

⁸Agturay a sililinteg iti lubong; awan idumdumana ti panangukomna kadagiti nasion.

⁹Ni Yahweh ti pagkamangan dagiti mairurumen; natalged a sarikedked iti nariribuk a panawen.

¹⁰Talkendaka, O Apo, dagiti makaammo kenka, dagiti agkamang kenka dimo baybay-an ida.

¹¹Agkantakayo kadagiti pagdayawyo iti Apo nga agturay idiay Sion! Dagiti inaramidna ipakaammoyo kadagiti nasnasion.

¹²Silalagip ti Dios kadagiti agsagsagaba; wen, dina malipatan dagiti sangsangitda, ket dusaenna dagiti mangranggas kadakuada.

¹³Kaasiannak, O Apo, kaasiannak! Kitaem ti panangranggas dagiti gumura kaniak. Iti patay, O Apo, isalakannak,

¹⁴tapno idiay Jerusalem agparangak kadagiti tattao, ket ipakaammok kadakuada ti gapu nga agdaydayawak kenka. Agragsakak agsipud ta insalakannak.

¹⁵Nagkali dagiti Hentil iti abut a nakatnaganda; nasiloanda iti iket nga impakatda.

¹⁶Impakaammo ti Apo ti bagina babaen kadagiti nalinteg a pangngeddengna, ket masiloan dagiti nakillo iti aramidda.

¹⁷Patay ti tungpal ti amin a managdakdakes, kasta met dagiti saan nga umawat iti Dios.

¹⁸Saan a kanayon a mabaybay-an dagiti napanglaw; ti namnama dagiti mailupitlupit saan met a mapukaw.

¹⁹Tumakderka, O Apo, dimo ipalubos a karitendaka dagiti tattao! Ummongem dagiti saan a mamati ket ukomem ida iti saklangmo.

²⁰Ikkam ida iti pagbutnganda, O Apo, tapno maammoanda a tattaoda laeng.