Read Iloko Psalms 90 Bible Online

Psalms 90 - Iloko bible

Psalms 90

¹Sika, O Apo, ti nagkamanganmi iti amin a kaputotan.

²Sakbay a pinarsuam dagiti bantay, wenno ti panangpaaddam iti lubong, agnanayonkan a Dios, wen, Dios iti awan inggana.

³Ibagam iti tao nga agsubli iti nagtaudanna; isublim iti tapok a kasisigudna.

⁴Ti sangaribu a tawen kenka, mayarigda iti maysa nga aldaw. Kasla kalman a napalabas, kas nabiit a panagbantay iti rabii.

⁵Ipanawmo dagiti tattao a kasla tagtagainep a lumabas. Mayarigda kadagiti ruot a tumubo iti bigat;

⁶dumakkel ken lumangtoda, ngem iti rabii, malaylay ken magangoda.

⁷Ikisapnakami iti pungtotmo; mabutengkami iti ungetmo.

⁸Impanayagmo dagiti labsingmi iti sangoanam, makitam dagiti nalimed a basolmi.

⁹Umababa dagiti aldawmi gapu iti pungtotmo; agpukaw ti biagmi a kas iti sennaay.

¹⁰Pitopulo la a tawen ti panagbiagmi, wenno walopulo, no nasalun-atkami. Nupay kasta, tuok ken ladingit ti yegda; agpatingga ti biag ket awankamton.

¹¹Siasino ti nakarikna iti naan-anay a bileg ti pungtotmo? Siasino ti makaammo iti buteng a yeg ti ungetmo?

¹²Isuronakami a mangbilang kadagiti aldawmi tapno agbalinkami a masirib.

¹³Mabayag pay aya, O Apo, ti panangtaliawmo kadakami? Kaasiam kadi dagiti adipenmo!

¹⁴Binigat koma a pennekennakami iti di agbalbaliw nga ayatmo, tapno agkanta ken naragsakkami iti unos ti panagbiagmi.

¹⁵Ikkannakami ita iti adu a ragsak, a kas iti adu a ladingit nga inyegmo, bayat dagiti tawen a panagsagabami.

¹⁶Ipakitam kadi kadakami nga adipenmo dagiti nakaskasdaaw nga aramidmo. Ipakitam met kadagiti kaputotanmi ti nadayag a pannakabalinmo.

¹⁷Bendisionannakami kadi, O Apo a Diosmi. Pagballigiennakam iti amin nga aramidmi!