Read Iloko Psalms 92 Bible Online

Psalms 92 - Iloko bible

Psalms 92

¹Nagsayaat ketdin ti agyaman kenka, O Apo, ti panagkanta iti pakaitan-okam, O Dios a Kangatoan.

²Wen, nagsayaaten ti binigat a pannakaipablaak ti di agbalbaliw nga ayatmo, ti rinabii a pannakaipaduyakyak ti kinamatalekmo.

³Nasayaat ti agkanta a danggayan ti nagkuerdas a pagtokaran, agraman ti aweng ti arpa.

⁴Paragsakendak, O Apo, dagiti naindaklan nga aramidmo. Gapu kadagiti gapuanam, agkantaak a sirarag-o.

⁵Naindaklan, O Apo, dagiti aramidmo; saan a matukod dagiti pampanunotmo.

⁶Saan nga ammo daytoy ti maag, di met maawatan ti nengneng.

⁷Mabalin nga agtubo a kas ruot dagiti nakillo, ket rumang-ay dagiti managdakdakes, ngem mamimpinsan a madadaelda.

⁸Ngamin, sika, O Apo, ti agnanayon a kangatoan.

⁹Ammomi a matayto dagiti kabusormo, ket mawarawaranto amin a managdakdakes.

¹⁰Pinapigsanak a kasla atap a toro a baka; pinaraburannak iti adu a ragsak.

¹¹Nakitak ti pannakaparmek dagiti kabusorko; ti ikkis dagiti managdakdakes nangngegko.

¹²Rumangpaya a kas kadagiti palma dagiti nalinteg a tattao. Dumadakkelda a kas sedro ti Libano.

¹³Kasladanto kadagiti kayo a naimula iti balay ti Apo, a rumangpaya iti Templo ti Diostayo.

¹⁴Uray no lallakaydan, nabungada latta, ket kanayon a nalangto ken nakiredda.

¹⁵Daytoy ti mangipakita a nalinteg ti Apo; awan kinakillo kenkuana a salaknibko.