Read Iloko Psalms 94 Bible Online

Psalms 94 - Iloko bible

Psalms 94

¹O Apo, maysaka a Dios a mangdusa; ipakitam ti pungtotmo!

²Tumakderka, sika nga ukom ti daga! Yetnagmo ti maikari a dusa dagiti natangsit a tattao.

³Kasano pay kabayag ti panagragragsak dagiti nadangkes? Wen, kasano pay kapaut, O Apo?

⁴Kasano pay kabayag ti panagpalangguad ken panagpasindayagda iti kinadakesda?

⁵Ilupitlupitda dagiti tattaom, O Apo; idadanesda dagiti pinilim a tattao.

⁶Patayenda dagiti ulila ken balo a babbai; pukawenda dagiti ganggannaet iti dagami.

⁷Kunada, “Saannatay a makita ti Apo; saan a madlaw ti Dios ti Israel ti ar-aramidentayo.”

⁸Ania ketdin a kinamaagyo, dakay a tattao! Kaanonto ti panagnakemyo?

⁹Pinarsua ti Dios dagiti lapayagtayo— saan kadi a makangngeg? Inaramidna dagiti matatayo— saanda kadi a makakita?

¹⁰Ungtanna dagiti pagilian— saanna kadi a dusaen ida? Isu a mannursuro kadagiti amin a tattao, awan kadi ti ammona?

¹¹Ammo ti Apo no ania ti pampanunotenda; wen, ammona nga ubbaw ti panagrasonda.

¹²Nagasat ti tao a bagbagaam, O Apo, ken sursuroam iti lintegmo!

¹³Ikkam iti inana kadagiti aldaw a nariribuk agingga a makali ti tanem dagiti managdakdakes.

¹⁴Saanto a baybay-an ti Apo dagiti tattaona, dinanto met panawan dagiti kukuana.

¹⁵Maisublinto ti hustisia kadagiti pangukoman, ket sumurotto dagiti amin a nalinteg a tattao.

¹⁶Siasino ti salaknibko idi kadagiti managdakdakes? Siasino ti nangikalintegan kaniak kadagiti agaramid iti dakes?

¹⁷No saannak a tinulongan ti Apo, nabayag koman a nalamiis a tanem ti ayanko.

¹⁸Kinunak, “Matuangakon,” ngem sinarapanak ti di agbalbaliw nga ayatmo, O Apo.

¹⁹No madanagan ken mariribukak, sika ti mangliwliwa ken mangparagsak kaniak.

²⁰Dimo kanunongan dagiti ukom a nakillo; ballikugenda ti hustisia a mangparigat kadagiti tattao.

²¹Agmaymaysada a mangilupitlupit kadagiti nalinteg a tattao, ket ikeddengda a mapapatay ti awan basolna.

²²Ngem ikaluyanak ti Apo; ti Diosko ti bato a salaknibko.

²³Dusaennanto ida gapu iti kinadakesda, ket pukawennanto ida gapu iti basolda; wen, pukawento ida ti Apo a Diostayo.