Read Iloko Psalms 96 Bible Online

Psalms 96 - Iloko bible

Psalms 96

¹Kantaanyo ti Apo iti baro a kanta! Kantaanyo ti Apo, dakayo amin a tattao iti daga.

²Wen, kantaanyo ti Apo ket idaydayawyo! Inaldaw nga ipakaammoyo ti damag ti panangisalakanna kadatayo.

³Ipakaammoyo ti dayagna kadagiti pagilian, dagiti nabileg nga aramidna kadagiti amin a tattao.

⁴Naindaklan ti Apo ket maikari a naindaklan ti panangidaydayawtayo. Ad-adda a pagbutngan ngem dagiti amin a dios.

⁵Imahen laeng dagiti didiosen dagiti pagilian; ngem pinarsua ti Apo dagiti langit.

⁶Adda dayaw ken kinatan-ok iti sangoananna; adda bileg ken pintas iti santuariona.

⁷Idaydayawyo ti Apo, dakayo amin a tattao ditoy daga; itan-okyo ti dayag ken pannakabalinna.

⁸Dayawenyo ti nadayag a nagan ti Apo; mangitugotkayo iti sagut, ket sumrekkayo iti Templona.

⁹Agrukbabkay iti Nasantoan inton agparang. Agpigergerkayo iti sangoananna, dakayo amin a tattao.

¹⁰Ibagayo kadagiti nasion, “Agari ti Apo! Naipasdek a nalaing ti daga ket awan ti pannakagunggonna. Nalintegto ti panangukomna kadagiti tattaona.”

¹¹Agragsakkayo, langit ken daga! Agdaranudorka, taaw ken amin nga adda kenka.

¹²Agrag-okayo, tay-ak ken amin nga adda kadakayo! Amin a kayo iti kabakiran, agriawkayo iti rag-o.

¹³Inton umay ukomen ti Apo ti daga, nalinteg ken awan idumdumana iti panangukomna iti amin a tattao ditoy lubong.