Read Iloko Psalms 98 Bible Online

Psalms 98 - Iloko bible

Psalms 98

¹Kantaanyo ti Apo iti baro a kanta gapu kadagiti nakaskasdaaw nga inaramidna. Nagun-odna ti balligi babaen iti bileg ken ti nasantoan a pannakabalinna.

²Inwaragawag ni Yahweh ti panagballigina. Impakaammona kadagiti pagilian ti pannakabalinna a mangisalakan.

³Tinungpalna ti karina kadagiti Israelita; nalagipna ti kinapudno ken ayatna kadakuada. Nakita dagiti tattao iti amin a disso ti panagballigi ti Diostayo.

⁴Idir-iyo, dakayo amin a daga, ti pagdaydayawyo iti Apo. Itan-okyo kadagiti kanta ken dir-i ti rag-o.

⁵Agkantakayo a mangidaydayaw iti Apo; agtokarkayo iti arpa!

⁶Puyotenyo ti tangguyob ken trumpeta, ket idir-iyo ti rag-o iti Apo nga ariyo.

⁷Agdaranudorka, baybay, ken amin a linaonmo. Agkantaka, daga, ken amin nga adda kenka.

⁸Dakay a karayan, agtipatkayo. Dakayo a turod, agdadanggaykayo nga agkanta iti rag-o iti sango ti Apo,

⁹ta umayna ukomen ti daga! Nalinteg ken awan idumdumana iti panangukomna iti amin a tao.