Read Iloko Proverbs 11 Bible Online

Proverbs 11 - Iloko bible

Proverbs 11

¹Kagura ti Apo dagiti tattao nga agusar kadagiti saur a pagtimbangan. Pagragsakanna ketdi ti umno a pagtimbangan.

²Dandanin ti pannakaibabain dagiti natangsit. Nasaysayaat ti agpakumbaba.

³No naimbagka a tao, maidalanka babaen iti kinataknengmo. Madadael dagiti saan a mapagtalkan babaen iti bukodda a kinakillo.

⁴Iti aldaw a sumangoka ken patay, awan ti maitulong kenka ti kinabaknangmo, ngem ti kinalinteg ti mangispal iti biagmo.

⁵Ti kinatakneng panam-ayenna ti biag ti nalinteg a tao, ngem matnag ti managdakdakes iti mismo a kinadakesna.

⁶Ti kinalinteg ti mangispal iti natakneng a tao, ngem ti saan a mapagtalkan maipalab-og iti bukodna a kinaagum.

⁷No matay ti dakes a tao, matay metten ti namnamana. Awan serserbi ti panangnamnama iti kinabaknang.

⁸No nalintegka, masalaknibanka iti riribuk; ngem agdissuor ti riribuk iti dakes a tao.

⁹Mabalin a madadaelka iti sao dagiti awan diosna; ngem maispalka babaen iti kinasirib dagiti nalinteg.

¹⁰Agragsak ti siudad no rumang-ay dagiti natakneng a tattao, ket agdir-i iti ragsak no matay dagiti managdakdakes.

¹¹Agbalin a naindaklan ti siudad no bendisionan ti nalinteg a tao, ngem madadael ti siudad gapu kadagiti sao dagiti managdakdakes.

¹²Kinamaag ti panangumsi iti padam a tao. Ngem no adda pannakaawatmo kaykayatmo ti agulimek.

¹³Dimo mabalin nga italek ti maysa a palimed iti mannanao, ngem mabalinmo ti agtalek iti mapagtalkan a tao.

¹⁴Matnag ti maysa a nasion no awan ti mangidalan. Natalged no adu dagiti mammagbaga.

¹⁵No ikarim a bayadan ti utang ti maysa a ganggannaet, agbabawikanto. Awan ti pakaan-anoam no dika makibiang.

¹⁶Mararaem ti naasi a babai, ngem maibabain ti babai a saan a natakneng. Awan matgedan ti nasadut, ngem bumaknang ti nagaget.

¹⁷Pagimbagam met laeng no naasika, ta no naranggaska sika met la ti agsagaba.

¹⁸Awan magangganab dagiti managdakdakes, ngem no agaramidka iti naimbag awan duadua a magunggonaanka.

¹⁹Agbiag ti tao a naregget nga agaramid iti naimbag, ngem matay ti tao a mangipapilit nga agaramid iti dakes.

²⁰Kagura ti Apo dagiti dakes ti panunotna, ngem kaay-ayona dagiti agaramid iti nasayaat.

²¹Namnamaem a madusa dagiti dakes a tattao, ngem maispal dagiti nalinteg.

²²Ti kinapintas ti babai nga awan nakemna mayarig iti balitok a singsing iti subsob ti baboy.

²³Kanayon a naimbag ti pagbanagan ti tarigagay dagiti nalinteg; no magun-od ti managdakdakes ti kayatna, makapungtot ti tunggal maysa.

²⁴Adda tattao a managparabur ngem bumaknangda latta. Adda dagiti kirmet ngem ad-adda a pumanglawda.

²⁵No managparaburka, rumang-ayka. Tulongam ti padam a tao ket tulongannaka met.

²⁶Ilunod dagiti tattao ti agtagtagilako a mangilemmeng iti bagas, ngem dayawenda ti mangiruar iti daytoy tapno ilakona.

²⁷Mararaemka no naimbag dagiti panggepmo, ngem no agsapsapulka iti riribuk awan duadua a masarakam.

²⁸Kasla bulbulong iti kalgaw a matnag dagiti tattao nga agtalek iti sanikuada, ngem rumangpaya dagiti nalinteg a kasla bulbulong iti tudtudo.

²⁹Ti tao a mangyeg iti riribuk iti familiana, awanto ti apitenna iti kamaudianna. Dagiti maag adipento latta dagiti masirib.

³⁰Biag ti ited ti kinalinteg, ngem babaen iti kinaranggas, maikkat ti biag.

³¹Magunggonaan ti naimbag a tao ditoy daga; ngarud, awan duadua a madusa dagiti managdakdakes ken managbasol.