Read Iloko Proverbs 12 Bible Online

Proverbs 12 - Iloko bible

Proverbs 12

¹Ti tao a mangipateg iti sursuro kayatna a maibaga ti nagbiddutanna. Kinamaag ti manggura iti pannakaisuro.

²Maragsakan ti Apo kadagiti naimbag a tattao, ngem ukomenna dagiti agpanggep iti dakes.

³Awan talged iti kinadakes, ngem natalged ti nalinteg.

⁴Ti naimbag nga asawa isu ti balangat ti lakayna. Ngem no mangyeg ti babai iti pakaibabainan ti asawana, mayarig iti kanser a mangrunot kadagiti tulang ti asawana.

⁵Dinaka gundawayan ti natakneng a tao, ngem maymaysa ti panggep ti managdakdakes: kayatnaka nga allilawen.

⁶Makapatay ti sao dagiti managdakdakes, ngem ti sao ti nalinteg ti mangispal iti biag ti maisiksikat.

⁷Maitublak dagiti managdakdakes ket didan makabangon; awan mabati a kaputotanda, ngem mataginayon ti familia ti nalinteg a tao.

⁸No nasariritka, idaydayawdaka dagiti tattao; no nengnengka, uyawendaka.

⁹Nasaysayaat ti gagangay a tao a mangged tapno adda pagbiagna, ngem ti agimbabaknang ngem mabisbisinan.

¹⁰Aywanan ti naimbag a tao dagiti animalna, ngem naranggas dagiti managdakdakes kadagiti animalda.

¹¹Adunto ti taraon ti nagaget a mannalon, ngem kinamaag ti mangdaddadael iti tiempona kadagiti awan serserbina nga aramid.

¹²Ti laeng dakes ti kayat nga aramiden dagiti managdakdakes, ngem natalged dagiti nalinteg.

¹³Masiloan ti managdakdakes kadagiti mismo a saona, ngem ti nalinteg a tao mailisina ti bagina iti riribuk.

¹⁴Maibatay ti gunggonatayo iti sao ken aramidtayo; awatentayo ti maikari kadatayo.

¹⁵Ipagarup ti maag a kanayon a husto ti aramidna, ngem ti masirib dumngeg iti pammagbaga.

¹⁶No masair ti maag, dagdagusenna nga ipakita ti pannakasuronna. Saan nga ikaskaso ti natakneng ti pannakainsultona.

¹⁷No ibagam ti pudno, maipakat ti hustisia; ngem no ulbod ti sawem, maballikug ti hustisia.

¹⁸Sumugat a kas natadem a kampilan ti nasakit a sao, ngem makapaimbag ti nasayaat a balikas.

¹⁹Saan nga agpaut ti ulbod, ngem agtalinaed iti agnanayon ti pudno.

²⁰Dagiti agpanggep iti dakes adda dakes nga agur-uray a mangkellaat kadakuada, ngem dagiti agaramid iti naimbag adda ragsak a masarakanda.

²¹Awan ti dakes a mapasamak ti nalinteg, ngem pasig a riribuk ti lak-amen dagiti managdakdakes.

²²Kagura ti Apo dagiti naulbod, ngem kaay-ayona dagiti mangtungpal iti saoda.

²³Saan nga iparammag ti manakem a tao ti ammona, ngem ti maag ibutaktakna ti kina-ignorantena.

²⁴No nagagetka, maaddaanka iti pannakabalin; ngem no sadutka, agbalinka a tagabu.

²⁵Ti danag ti mangikkat iti ragsak ti tao, ngem naimbag a sarita ti mangliwliwa kenkuana.

²⁶Usigen ti nalinteg a tao ti ugalina, ngem mayaw-awan ti managdakdakes iti dalan.

²⁷Saan a magun-od ti nasadut ti tarigagayanna, ngem kinabaknang ti magun-od ti nagaget.

²⁸Ti kinalinteg ti dalan nga agturong iti biag; ngem kinamaag ti dalan nga agturong ken patay.