Read Iloko Proverbs 13 Bible Online

Proverbs 13 - Iloko bible

Proverbs 13

¹No masirib ti anak, dumngeg no babalawen ti amana a kas pangisurona kenkuana. Ngem pulos a saan nga awaten ti natangsit ti biddutna.

²Magunggonaan dagiti naimbag a tao gapu iti saoda, ngem dagiti ulbod agreggetda nga agranggas.

³Annadam ti saom tapno masalakniban ti biagmo. Ti tao a dina panunoten nga umuna ti sawenna, dadaelenna ti mismo a bagina.

⁴Nupay kasano ti panagtarigagay ti nasadut iti maysa a banag, pulos a dinanto magun-od. Ti nagaget a tao maalana amin a kayatna.

⁵Kagura dagiti natakneng ti kinaulbod, ngem nakababain ti sao dagiti managdakdakes.

⁶Ti kinalinteg salaknibanna ti awan basolna. Ti kinadakes ti puon ti pakatnagan dagiti managbasol.

⁷Adda dagiti agimbabaknang ngem awananda. Adda met dagiti agimpapanglaw ngem adu ti sanikuada.

⁸Masapul nga aramaten ti baknang ti kuartana tapno maispal ti biagna, ngem awan ti mangisikat iti napanglaw.

⁹Mayarig ti nalinteg a tao iti naraniag a silaw. Mayarig met ti managdakdakes iti agkurkuridemdem a lampara.

¹⁰Riribuk laeng ti patauden ti kinatangsit. Naim-imbag ti pabagbagaan.

¹¹No nalaka ti pananggun-odmo iti kinabaknangmo, mabiit met a mapukaw. No nagrigatam ti sanikuam, manayonanto.

¹²No madadael ti namnama, madadael met ti rikna, ngem ti pumudno a tarigagay, punnoennaka iti rag-o.

¹³No dimo ipangag ti naimbag a pammagbaga, kasmo la dawdawaten ti riribuk nga agdissuor kenka; tungpalem ti pammagbaga ket awan ti pakaan-anoam.

¹⁴Ubbog ti biag ti pannursuro dagiti masirib; ilisinaka no agpeggad ti biagmo.

¹⁵Mararaem ti kinasaririt, ngem ti tao a saan a mapagtalkan agturong iti dalan ti pannakadadael.

¹⁶Agpanunot nga umuna ti manakem a tao sakbay nga ibanagna ti aramidna, ngem ti maag ibutaktakna ti kina-ignorantena.

¹⁷Ti saan a mapagtalkan a babaonen pataudenna ti riribuk, ngem ti mapagtalkan mangyeg iti kappia.

¹⁸Ti tao a dina kayat ti paisuro pumanglaw ken maibabain. Mararaem ti tao a dumngeg iti pammabalaw ket ibilangna a pangisuro kenkuana.

¹⁹Nagsayaat ketdin no maalam ti tarigagayam! Saan a kayat dagiti maag ti mangiwaksi iti dakes.

²⁰Makikaduaka kadagiti masirib ket agbalinka met a masirib. Makigayyemka kadagiti maag ket madadaelka.

²¹Sumursurot ti riribuk kadagiti managbasol iti sadinoman a papananda, ngem magunggonaanto dagiti nalinteg iti agkakaimbag a banag.

²²Addanto kinabaknang ti naimbag a tao nga ipatawidna kadagiti appokona, ngem mapan kadagiti nalinteg ti kinabaknang dagiti managbasol.

²³Dagiti di mataltalon a daga mapataudda ti adu a taraon nga agpaay kadagiti napanglaw, ngem lappedan dagiti nakillo ti pannakatalonna.

²⁴No dimo dusaen ti anakmo, dimo ay-ayaten. No ay-ayatem, disiplinaam.

²⁵Adda latta umdas a taraon dagiti nalinteg, ngem kanayon a mabisin dagiti managdakdakes.