Read Iloko Proverbs 14 Bible Online

Proverbs 14 - Iloko bible

Proverbs 14

¹Mabangon dagiti pagtaengan babaen iti kinasirib dagiti babbai, ngem madadaelda babaen iti kinamaag.

²No nalintegka, maipakita nga agbutengka iti Apo. No nakilloka, maiparangarang a dika agraem kenkuana.

³Adu ti masao ti maag gapu iti kinapalangguadna; ngem ti masirib masalakniban gapu iti bukodna a sao.

⁴No awan ti animal nga agguyod iti arado, awan ti maipempen iti kamaligmo, ngem no adda animal, adu ti maapitmo.

⁵Ti mapagtalkan a saksi ibagana ti pudno, ngem ti natiri, pasig nga ulbod ti sawenna.

⁶Saan a sumirib ti tao a mangipagarup nga isu laeng ti nalaing, ngem ti nasaririt a tao nalaka a makasursuro.

⁷Adaywam dagiti maag; awan ti maisuroda kenka.

⁸Apay a masirib ti nasiglat a tao? Gapu ta ammona ti aramidenna. Apay a nengneng ti maag a tao? Gapu ta ipagarupna nga isu laeng ti adda ammona.

⁹Awan aniamanna kadagiti maag no agbasolda, ngem dagiti naimbag a tattao kayatda ti mapakawan.

¹⁰Bukodmo ti ragsakmo; bukodmo ti ladingitmo. Awan ti sabali a mairaman kadagitoy a rikna.

¹¹Agtaktakderto pay laeng ti balay ti naimbag a tao ngem nadadaelton ti pagtaengan ti managdakdakes.

¹²Adda dalan a kasla nalinteg iti imatang ti tao, ngem agturong iti patay.

¹³Mabalin nga ilinged ti liday babaen iti katawa. Ngem no awanen ti ragsak, adda latta ladingit.

¹⁴Apiten ti nakillo a tao ti bunga ti aramidna. Magunggonaan ti naimbag a tao gapu kadagiti gapuananna.

¹⁵Patien ti maag ti amin a mangngegna; annadan ti manakem ti pannagnana.

¹⁶Naannad ti manakem a tao ket adaywanna ti riribuk; ngem darasudos ti maag ket aggunay a dagus a dina panunoten nga umuna ti ibunga ti aramidna.

¹⁷Minamaag ti aramid ti tao a nalaka nga agpungtot; ngem ti masirib natalna ti pakinakemna.

¹⁸Magun-od ti nengneng ti bunga ti kinamaagna; ngem ti nasiglat a tao maaddaan iti ammo a kas gunggonana.

¹⁹Agtamed dagiti managdakdakes kadagiti nalinteg ket sipapakumbabada nga agdawat iti paraburda.

²⁰Awan ti mangayat iti napanglaw a tao. Saan a kayat uray ti kaarubana, ngem adu ti gayyem dagiti babaknang.

²¹No kayatmo a naragsakka, kaasiam dagiti napanglaw; basol ti mangumsi kadakuada.

²²No agtrabahoka iti pagimbagan, magun-odmo ti panagtalek ken panagraem ti tao; no agtrabahoka iti pagdaksan, dakkel a biddut ti aramidmo.

²³Agtrabahoka ket makateggedka iti pagbiagmo; agtugawka a manarsarita ket pumanglawka.

²⁴Kinabaknang ti gunggona dagiti masirib, ngem agdindinamag ti maag gapu iti kinamaagna.

²⁵No pudno ti sao ti saksi, adu a biag ti isalakanna; no agsao iti ulbod, liputanna dagiti tattao.

²⁶Ti sibubuteng a panagdayaw ken iti Apo ikkanna ti talek ken talged ti maysa a tao ken ti familiana.

²⁷Kayatmo kadi a lisian ni patay? Ti panagraem iti Apo isu ti ubbog ti biag.

²⁸Maibilang a naindaklan ti maysa nga ari no adu ti iturayanna; awan serserbina no awan tattao nga iturayanna.

²⁹Masirib ti tao a natalna ti pakinakemna, ngem ti tao a nalaka nga agpungtot ipakitana laeng ti kinamaagna.

³⁰Mangted iti salun-at ti natalna a panunot, ngem ti imon mayarig iti kanser a mangrunot iti tulang.

³¹No idadanesmo dagiti napanglaw, insultoem ti Dios a nangparsua kadakuada; maysa a kita ti panagdaydayaw ti panangngaasi kadagiti nakurapay.

³²Dagiti killo nga aramid ti managdakdakes ti mangyeg iti mismo a pannakatnagna, ngem masalakniban ti naimbag a tao babaen iti kinataknengna.

³³Adda kinasirib iti panunot ti nasaririt; awan ti ammo dagiti maag maipapan iti kinasirib.

³⁴Ti kinalinteg ti mamagbalin a naindaklan ti maysa a nasion; ti basol ti pakaumsian ti aniaman a nasion.

³⁵Kaay-ayo dagiti ari dagiti ofisiales a makaammo kadagiti trabahoda, ngem dusaenda dagiti agliway kadagiti rebbengenda.