Read Iloko Proverbs 15 Bible Online

Proverbs 15 - Iloko bible

Proverbs 15

¹No napakumbaba ti sungbat, sebsebanna ti pungtot; ngem no nagubsang, ad-adda a rubrobanna.

²No agsao ti masirib, itan-okna ti sursuro, ngem ubbaw ti sasawen ti maag.

³Makita ti Apo ti mapaspasamak iti amin a lugar; sipsiputannatayo, dakes man wenno naimbag ti aramidentayo.

⁴Biag ti yeg ti nasayaat a sao, ngem ti nagubsang a balikas buriborenna ti panunot.

⁵Kinamaag ti saan a panangikankano iti pannursuro ni amam kenka; ipakitam a masiribka no ipangagmo ti panangisurona.

⁶Agtalinaed ti sanikua dagiti nalinteg, ngem mapukaw ti sanikua dagiti managdakdakes no dumteng ti didigra.

⁷Dagiti masirib a saan ketdi a dagiti maag ti mangisaknap iti sursuro.

⁸Maay-ayo ti Apo no agkararag dagiti naimbag, ngem kagurana dagiti daton nga idatag kenkuana dagiti managdakdakes.

⁹Kagura ti Apo dagiti aramid dagiti dakes a tao, ngem ayatenna ti maysa a tao nga agaramid iti naimbag.

¹⁰No saan a nasayaat ti aramidmo, nakaronto ti pannakadusam; matayka no dimo kayat ti paisuro.

¹¹Uray ti lubong dagiti natay saanna a mailemmeng iti Apo no ania ti adda sadiay; kasano ngarud nga ilemmeng ti tao dagiti pampanunotenna iti Dios?

¹²Ti tao a ti la bagina ti talkenna saanna a kayat ti paisuro; pulos a di agkiddaw iti pammagbaga kadagiti masirib.

¹³Naisem ti tao no naragsak, ngem nalidem ti rupana no naliday.

¹⁴Kayat ti nasaririt a tao ti agsursuro, ngem mapneken ti nengneng iti kina-ignorantena.

¹⁵Pasig a pannakibakal ti biag ti napanglaw, ngem inaldaw a kasla agfiesta dagiti naragsak a tattao.

¹⁶Nasaysayaat ti napanglaw nga adda panagbutengna iti Apo ngem ti nabaknang nga adda parikut ti biagna.

¹⁷Nasaysayaat ti agsida iti nateng a kasangom dagiti tattao nga ay-ayatem ngem ti agsida iti kaimasan a karne nga adda gura iti unegmo.

¹⁸Ti pungtot pataudenna ti riribuk, ngem ti anus yegna ti kappia.

¹⁹No nasadutka, rigat la ti adda iti amin a papanam, ngem awan ti parikut a dumteng kenka no saanka nga ulbod.

²⁰Paragsaken ti masirib nga anak ti amana. Ti laeng maag ti mangumsi iti inana.

²¹Naragsak dagiti nengneng iti minamaag nga aramidda, ngem ti masirib nalinteg ti dalanna.

²²Awatem ti amin a pammagbaga a mabalinmo a dawaten ket agballigikanto; no awan ti balakad awan banag ti panggepmo.

²³Anian a ragsaktayo no masarakantayo ti tumutop a sao iti tumutop nga okasion!

²⁴Magna ti masirib a tao iti dalan nga agturong iti biag, saan nga iti dana nga agturong iti patay.

²⁵Rebbaen ti Apo dagiti balay dagiti napalangguad, ngem salaknibanna ti sanikua ti babai a balo.

²⁶Kagura ti Apo dagiti dakes a pampanunot, ngem kaay-ayona dagiti nasayaat a sao.

²⁷Agganansiaka iti sinasaur, ket yegmo ti riribuk iti familiam. Dika umawat iti pasuksok ket napautto ti biagmo.

²⁸Agpanunot nga umuna ti nalinteg a tao sakbay a sumungbat. Dagus a sumungbat ti managdakdakes ngem tumaud ti riribuk.

²⁹No agkararag dagiti nalinteg a tattao, dumngeg ni Yahweh ngem dina ikankano dagiti managdakdakes.

³⁰Paragsakennaka ti naisem a rupa ket ti naimbag a damag pasayaatenna ti rikna.

³¹No denggem ti pammabalaw a pangisuro kenka, maibilangka a masirib.

³²No dimo ipangag ti pannursuro, dangram met la ta bagim. No denggem ti pammagbaga, sumirsiribka.

³³Ti panagbuteng iti Apo maysa a kita ti sursuro. Masapul a napakumbabaka sakbay a mabalinmo ti umawat iti pammadayaw.