Read Iloko Proverbs 17 Bible Online

Proverbs 17 - Iloko bible

Proverbs 17

¹Nasaysayaat ti mangilabban a natalna ti panunotmo ngem ti makidaya iti balay a napno iti riribuk.

²Ti masirib nga adipen maiturayanna ti awan serserbina nga anak ti apona ket makipagtawid kadagiti sanikua.

³Magugoran ti balitok ken pirak babaen iti apuy, kas iti panangsuot ni Yahweh iti puso ti tao.

⁴Denggen dagiti managdakdakes dagiti dakes a panunot ket denggen met dagiti naulbod ti kinaulbod.

⁵No pagang-angawam ti napanglaw, insultoem ti Dios a nangaramid kenkuana. Madusaka no katawaam ti kinadaksanggasat ti maysa a tao.

⁶Ipannakkel dagiti lallakay dagiti appokoda kas iti panangipanakkel dagiti barito kadagiti ammada.

⁷Saan nga agulbod ti mararaem a tao; awan met nasayaat a sao nga isawang ti maag.

⁸Adda dagiti tattao a mangipagarup a kasla salamangka ti pasuksok: patienda a maaramidna ti uray ania a banag.

⁹No tarigagayam a kayatdaka dagiti tattao, pakawanem ida no makabasolda kenka. No lagipem dagiti biddut ti maysa a tao, madadael ti panaggayyemyo.

¹⁰Ad-adu ti maadal ti nasaririt a tao iti maminsan a pannakatubngarna ngem ti masursuro ti maag iti maminsangagasut a pannakasaplitna.

¹¹Dumteng ti patay a kasla naranggas a babaonen kadagiti managdakdakes a kanayon a mangpataud iti riribuk.

¹²Nasaysayaat a masabatmo ti ina nga oso a naipanaw dagiti urbonna ngem ti maag a madama nga agar-aramid iti linuloko.

¹³No dakes ti isupapakmo iti imbag, pulos a dimonto mapapanaw ti dakes iti balaymo.

¹⁴Ti panangrugi ti suppiat mayarig iti pannakaibuang ti danum ti tambak; sumardengka sakbay a dumakkel ti susik.

¹⁵Agpada a kagura ti Apo ti panangilunod iti awan basolna wenno ti panangipalubos nga agtuloy ti kinadakes.

¹⁶Awan serserbi nga aggastos ti maag iti panagadalna agsipud ta awan ti nakemna.

¹⁷Ipakita a kanayon ti maysa a gayyem ti panagayatna. Nayanak ti kabsat a tumulong iti tiempo ti rigat.

¹⁸Ti laeng tao nga awan nakemna ti mangikari a bayadanna ti utang ti kaarrubana.

¹⁹Ti panagayat iti basol kasla iti panagayat iti riribuk. No kanayonka a napangas, agbirbirokka iti riri.

²⁰Ti tao nga agpanunot ken agsao iti dakes awan ti namnamaenna a naimbag no di pasig a didigra.

²¹Bin-ig a ladingit ken sennaay ti lak-amen ti maysa nga ama a minamaag dagiti aramid ti anakna.

²²Agtalinaedka a naragsak no nasalun-atka. Main-inutka a matay no kanayon a nalidayka.

²³Awaten ti nakillo nga ukom ti pasuksok a maited kenkuana iti nalimed, ket saanen a maipakat ti hustisia.

²⁴Ammo ti manakem ti tumutop nga aramidenna. Adu ti irugi ti awan nakemna ngem pulos nga awan ti maibanagna.

²⁵Ti maag nga anak pagladingitenna ti amana; nasaem a sensennaay ti ipalak-amna iti inana.

²⁶Saan a rumbeng a multaen ti tao nga awan basolna; maballikug ti hustisia no madusa dagiti naimbag a tattao.

²⁷Saan a kanayon nga agsao ti tao nga agtalek iti bagina. Ti tao nga agulimek adda naan-anay a sirmatana.

²⁸Ngamin, uray ti maag maibilang a masirib no agulimek ket saan nga agun-uni.