Read Iloko Proverbs 18 Bible Online

Proverbs 18 - Iloko bible

Proverbs 18

¹Ti tao a dina ammo ti makilangen iti padana a tao ti la bagina ti pampanunotenna; kontraenna amin a naimbag a pangngeddeng.

²Awan aniamanna iti maag no maawatanna wenno saan ti maysa a banag; kayatna laeng nga ipakita ti kinalaingna.

³Agkuyog ti basol ken pannakaibabain. No mapukawmo ti dayawmo, sumukat ti pannakaumsi.

⁴Dagiti sao ti tao mabalin a paggubbuayan ti kinasirib; adalem a kas iti taaw ken nalitnaw a kas iti agay-ayus a karayan.

⁵Saan a rumbeng nga ayonan ti nakabasol gapu ta no kasta ti maaramid, saanen a maited ti hustisia kadagiti awan basolna.

⁶No irugi ti maag ti makisuppiat, isarsarakna la ti pannakakabilna.

⁷No agsao ti maag, dadaelenna ti mismo a bagina; dagiti saona ti mangsilo kenkuana.

⁸Kasla naimas a taraon ti pammadpadakes—magustoantayo nga ipauneg!

⁹Dakes ti nasadut, kas iti tao nga agdaddadael.

¹⁰Mayarig ti Apo iti nalagda a torre a mabalin a kamangan ti nalinteg ket awan ti pakaan-anoanna.

¹¹Ipagarup dagiti nabaknang a masalaknibanda gapu kadagiti sanikuada, kas iti nangato ken natibker a bakud a mangsalaknib iti siudad.

¹²Saan a maraem ti maysa a tao no saan a napakumbaba; ti natangsit a tao agturong iti pannakadadael.

¹³Dumngegka sakbay a sumungbatka. No dimo aramiden ti kasta, maibilangka a nengneng ken mangpabpabain.

¹⁴Ti pigsa ti pakinakem ti tao nga agbiag isut' mangpakired kenkuana no masakit; ngem no mapukaw daytoy, mapukawna metten ti kakaisuna a namnamana.

¹⁵Sigagagar ken sisasagana nga agsursuro dagiti masirib a tattao.

¹⁶Tapno nalaka a maam-ammom ti natan-ok a tao, ikkam iti sagut.

¹⁷Kasla pudno ti amin a sao ti umuna a mangikalintegan iti bagina iti pangukoman agingga nga iparang met ti bangir ti kalinteganna.

¹⁸No agdinnarum dagiti maingel a tattao, mabalin a ti nasagradoan a binnunot ti mangibanag iti kasoda.

¹⁹Tulongam ni kabsatmo ket salaknibannakanto a kasla nabileg a bakud ti siudad, ngem no makiapaka kenkuana, dinakanto pastreken iti balayna.

²⁰Apitemto ti bunga ti amin nga insawangmo.

²¹Mabalin a makaited iti biag wenno pakadadaelan ti padam a tao ti saom. Isut' gapuna nga awatem ti ibunga dagiti saom.

²²Mangasawaka ket naimbag a banag ti masarakam; daytoy ti pakakitaan a pinaraburannaka ti Apo.

²³Nadayaw ti panagsao ti napanglaw, ngem ti nabaknang, sumungbat a sigugubsang.

²⁴Adda tattao nga agpammarang a gayyem, ngem adda gayyem a nadekdekket pay ngem ti kakabsat.