Read Iloko Proverbs 19 Bible Online

Proverbs 19 - Iloko bible

Proverbs 19

¹Nasaysayaat ti napanglaw a natakneng ti panagbiagna ngem ti naulbod a maag.

²Saan a naimbag ti addaan iti regta a di mabuyogan iti ammo. No dika makaan-anus maisagmakka iti riribuk.

³Adda tattao a mangdadael kadagiti bagbagida babaen kadagiti minamaag nga aramidda sada pabasolen ti Apo.

⁴Kanayon a makasarak dagiti nabaknang iti baro a gagayyemda, ngem mapukaw ti napanglaw ti sumagmamano a gayyemna.

⁵Madusaka no agsaoka iti ulbod iti pangukoman; saankanto a makalisi.

⁶Tarigagayan ti amin ti parabur dagiti natan-ok a tattao, ket gayyem ti kaaduan ti naparabur a tao.

⁷Ti napanglaw saan a pagan-ano uray dagiti kakabsatna; di mapilaw nga awan ti gayyemna. Uray ania ti aramidenna, awan ti maawisna a gayyemna.

⁸Tulongam ti bagim ket adalem ti amin a mabalinmo a sursuroen; laglagipem ti inadalmo ket rumang-aykanto.

⁹Awan duadua ti pannakadusa ti siasinoman nga agsao iti ulbod iti pangukoman; saan a makalisi ti kasta a tao.

¹⁰Ti nalabon a panagbiag saan a maiparbeng kadagiti maag. Kasta met a di met rumbeng nga iturayan dagiti tagabu dagiti prinsipe.

¹¹No manakemka, saanka a nalaka nga agpungtot. No adda makaaramid iti saan a nasayaat kenka, pakaidayawam no palabsem ti biddutna.

¹²Mayarig iti ngernger ti leon ti pungtot ti maysa nga ari, ngem ti paraburna kas iti segseggaan a tudo.

¹³Pakadadaelan ti ama ti maag nga anak, ket ti naunget ken managreklamo nga asawa a babai kasla danum nga agtedtedted.

¹⁴Mabalin a tawiden ti maysa a tao ti balay ken ti kuarta dagiti nagannak kenkuana, ngem ti Apo laeng ti makaited kenkuana iti manakem nga asawa.

¹⁵Itultuloymo latta ti agsadut; maturogka iti kaykayatmo, ngem agbisinkanto.

¹⁶Tungpalem dagiti bilin ti Dios ket napautto ti biagmo; no dimo ikankano ida, mataykanto.

¹⁷No ikkam ti napanglaw, kasla ni Yahweh ti nangtedam ket subadannakanto ti Apo.

¹⁸Disiplinaem dagiti annakmo ita ta ubbingda pay nga adda pagnaan ti pannursuro. No dimo disiplinaen ida, tultulongam ida a mangdadael kadagiti bagbagida.

¹⁹No managpungtot ti maysa a tao, bay-am a sagabaenna ti dusa ti aramidna. No naminsan a naispalmo, masapul nga ispalemto manen.

²⁰No dumngegka iti pammagbaga ket siaayatka nga umawat iti pannursuro, addanto aldaw a sumiribka.

²¹Mabalin a planoen ti tao ti amin a banag, ngem ti pagayatan ni Yahweh ti matungpal.

²²Nakababain ti tao a buklis; nasaysayaat ti napanglaw ngem ti naulbod.

²³Agtulnogka iti Apo no ket napautto ti biagmo, natalged ken awan ti pakaan-anoam.

²⁴Adda dagiti tattao a napalalo ti sadutda ket dida pay kayat a subuan dagiti ngiwatda.

²⁵Rumbeng a madusa dagiti natangsit tapno makasursuro dagiti maag; no masiribka, makasursuroka no mababalawka.

²⁶Ti la tao nga awan babainna ken naalas ti aramidna ti mangranggas iti amana ken mangpapanaw iti inana.

²⁷Anak, no isardengmo ti agsursuro, malipatamton ti sigud nga ammom.

²⁸Awan ti hustisia no pinanggep ti maysa a saksi a dangran ti sabali. Pagay-ayat dagiti nakillo ti agaramid iti dakes.

²⁹Awan duadua a masaplit ti maag a mangipagarup a nalinteg ti bagina.