Read Iloko Proverbs 2 Bible Online

Proverbs 2 - Iloko bible

Proverbs 2

¹Anakko, adalem ti isurok kenka, ket dimo liplipatan ti ibagak nga aramidem.

²Ipangagmo ti kinasirib, ket ikagumaam nga awaten.

³Agdawatka a maikkanka iti saririt ken agpakpakaasika a maaddaanka iti pannakaawat.

⁴Birokem ti kinasirib a kas iti panangbirokmo iti pirak, wenno iti nailemmeng a gameng.

⁵No aramidem ti kasta, maammoam ti kaipapanan ti panagbuteng iti Apo ket awan duadua a masursuromto ti maipapan iti Dios.

⁶Ta ti Apo ti mangted iti kinasirib. Isut' pagtaudan ti ammo ken pannakaawat.

⁷Tulongan ken salaknibanna dagiti nalinteg ken dagiti nasingpet.

⁸Aywananna dagiti saan a mangidumduma, ket saluadanna dagiti napudno kenkuana.

⁹No ipangagnak, maawatamto no ania ti naimbag, nalinteg ken ti saan a panangidumduma. Ammomto no ania ti rumbeng nga aramidem.

¹⁰Agbalinkanto a masirib ket paragsakennakanto ti kinasiribmo.

¹¹Saluadannakanto ti sirmata ken pannakaawatmo;

¹²ket ilisidakanto iti panagaramidmo iti dakes. Yadayodakanto kadagiti mangpataud iti riribuk babaen iti pamadpadakesda—

¹³tattao a simmiasi iti nalinteg a panagbiag tapno agtaengda iti kinasipnget ti basol.

¹⁴Pagragsakan dagiti kakasta a tattao ti panagaramidda iti dakes ken ti awan serserbina a kinakillo.

¹⁵Saanda a mapangnamnamaan ket saanda a mapagtalkan.

¹⁶Malisiamto ti panangsulisog kenka ti siasinoman a balangkantis a babai babaen iti makaallukoy a saona,

¹⁷ti babai a saan a napudno iti asawana ket malipatanna ti nasantoan a karina.

¹⁸No inka iti balayna agdaliasatka iti dalan ni patay. No inka sadiay, umasidegka iti lubong dagiti natay.

¹⁹Saanen nga agsubli ti mapan kenkuana. Pulos a saanen nga agsubli iti dalan nga agturong iti biag.

²⁰Surotem ngarud ti ulidan dagiti naimbag a tattao ket agbiagka a nalinteg.

²¹Agtaengto ditoy dagatayo dagiti nalinteg, tattao a natakneng ken nadalus ti panagbiagna.

²²Ngem rabsutento ti Dios dagiti managdakdakes iti daytoy a pagilian; parutennanto dagiti managbasol iti daga a kasla iti pannakaparut iti mula.