Read Iloko Proverbs 20 Bible Online

Proverbs 20 - Iloko bible

Proverbs 20

¹No makaadum ti uminum iti arak, nangalawngawka ket agbalinka a maag. Maysa a kinamaag ti agbartek.

²Agbutengka iti makapungtot nga ari a kas iti panagbutengmo iti ngumerngernger a leon; agpeggad ti biagmo no pagpungtotem ti ari.

³Mabalin nga irugi ti siasinoman a maag ti aniaman a suppiat; nadaydayaw ti mangliklik iti panagsusuppiat.

⁴Awanto ti apiten ti mannalon a nasadut a mangarado iti talonna no dumteng ti tumutop a tiempo.

⁵Mayarig iti danum ti nauneg a bubon ti pampanunoten ti maysa a tao, ngem kabaelan a yaon ti tao nga addaan iti sirmata.

⁶Adu ti mangipagarup iti bagida a napudno ken mapagtalkanda, ngem sadino ti pakasarakan iti kasta a tao?

⁷Nagasat dagiti annak no natakneng ti amada ken nalinteg ti aramidna.

⁸Agtugaw a mangukom ti ari ket awan ti dakes a mailinged kenkuana.

⁹Adda ngata tao a makaibaga a nadalus ti konsensiana, a tinallikudannan dagiti basolna?

¹⁰Kagura ti Apo dagiti agusar iti saan a husto a timbangan ken pagsukatan.

¹¹Uray ti maysa nga ubing ipakitana ti kinasiasinona babaen iti aramidna; maibagam no nalinteg ken naimbag.

¹²Inikkannatayo ti Apo iti mata a pagkita ken iti lapayag a pagdengngeg.

¹³Pumanglawka no ti la matmaturog ti ar-aramidem. No nagagetka, adunto ti taraonmo.

¹⁴Kanayon nga agreklamo ti gumatgatang iti kinangato ti presio, ngem no makapanawen, iparammagna ti laingna a timmawar iti ginatangna.

¹⁵No ammom ti sasawem, addaanka iti napatpateg ngem balitok wenno alahas.

¹⁶Siasinoman a maag unay a mangikari a mangbayad iti utang ti maysa a ganggannaet, masapul a maigawid ti sanikuana tapno masigurado ti panagbayadna.

¹⁷Mabalin a naimas a taraon ti magun-odmo iti kinasuitik, ngem iti saan a mabayag, mayarig iti darat a maipamelmel kenka.

¹⁸Agkiddawka iti nasayaat a pammagbaga ket agballigika; dika agdarasudos a mapan iti paggugubatan no awan ti planom.

¹⁹Awan palimed a mailemmeng ti mannanao; adaywam ti tao a nalaing a sumao.

²⁰No ilunodmo dagiti nagannak kenka, aggibus ti biagmo a kas iti pagsilawan a maiddep iti kasipngetan.

²¹No nalaka ti pananggun-odmo iti sanikuam, basbassitto ti imbag a maitedna kenka iti kamaudianan.

²²Dimo ibales ti dakes a naaramid kenka. Agtalekka iti Apo a mangispal kenka.

²³Kagura ti Apo dagiti agaramat kadagiti saan a husto a timbangan ken pagsukatan.

²⁴Inkeddeng ti Apo ti pagnaantayo; kasano ngarud a maawatan ti tao ti bukodna a biag?

²⁵Agpanunotka a nalaing sakbay nga ikarim a mangidatagka iti daton iti Dios, amangan no agbabawika.

²⁶Maammoanto ti masirib nga ari ti agar-aramid iti dakes, ket awanto ti asina a mangdusa iti nagbiddut.

²⁷Inted ni Yahweh kadatayo ti panunot ken konsensiatayo; ditay mailemmeng ti kinasiasinotayo.

²⁸Agtalinaed ti ari iti panagturayna, no la ket napudno, nalinteg ken awan idumdumana.

²⁹Bigbigentayo ti pigsa ti kinaagtutubo ket raementayo ti uban ti nataengan.

³⁰No dadduma, masapul ti nasaem a padas tapno balbaliwantayo dagiti wagastayo.