Read Iloko Proverbs 21 Bible Online

Proverbs 21 - Iloko bible

Proverbs 21

¹Nalaka nga idalan ti Apo ti panunot ti ari, a kas iti kalaka ti panangiturongna iti ayus ti waig.

²Mabalin nga ipagarupmo a naimbag amin nga aramidmo, ngem laglagipem a tingitingen ti Apo dagiti panggepmo.

³Aramidem ti naimbag ken nainkalintegan; ad-adda a maragsakan ni Yahweh iti dayta ngem ti panangidatagmo iti daton.

⁴Kinatangsit ken kinapalangguad ti mangituray kadagiti managdakdakes ket maibilang a basol dagitoy.

⁵Agplanoka a siaannad ket maaddaankanto iti nawadwad; no gangganatem ti aramidmo, agkurangkanto iti kasapulan.

⁶Mabiit a mapukaw ti sanikua a nagun-odmo iti sinasaur, ket mayarig iti silo a mangiturong kenka iti ngiwat ni patay.

⁷Matnag dagiti managdakdakes iti kinaranggasda. Dida kayat ti agaramid iti nalinteg.

⁸Nakillo ti dalan dagiti adda basolna; naimbag ti aramid dagiti nalinteg.

⁹Nasaysayaat ti agnaed iti tuktok ti balay, ngem ti makidenna iti mannakisubang nga asawa.

¹⁰Kanayon a mawaw dagiti managdakdakes nga agaramid iti dakes; awan a pulos ti asida iti padada a tao.

¹¹No madusa ti maysa a tao a mangipagarup a ti la bagina ti naimbag, uray pay ti nengneng sumirib. Makaadal ti masirib iti maisuro kenkuana.

¹²Ammo ti nalinteg a Dios ti mapaspasamak iti balbalay dagiti managdakdakes, ket yegna ti pakadadaelanda.

¹³No dimo ipangag ti asug ti napanglaw, saankanto met a maipangag inton sika ti umawag.

¹⁴No kapungtotnaka ti maysa a tao, sagutam iti nalimed ket agbaaw ti pungtotna.

¹⁵No maipakat ti hustisia, maragsakan dagiti naimbag a tattao, ngem maladingitan dagiti managdakdakes.

¹⁶Ur-urayen ni patay ti maysa a tao a sumina iti naimbag a dalan.

¹⁷No naayatka iti ragragsak, arak ken agkakaimas a taraon, pulos a dika bumaknang.

¹⁸Sagabaen dagiti managdakdakes ti rigat a panggepda nga ipalak-am kadagiti naimbag a tattao.

¹⁹Naim-imbag ti agbiag a maymaysa iti let-ang ngem ti makikabbalay iti naunget ken managreklamo nga asawa.

²⁰Agbiag iti kinabaknang ken kinanam-ay dagiti masirib, ngem ti maag busbosenna a sipapardas ti natgedanna.

²¹No naasi ken nalintegka, napautto ti panagbiagmo; raemendakanto dagiti tattao ket kalangendakanto a nasayaat.

²²Ti nasikap a heneral kabaelanna a sakupen ti maysa a siudad a salsalakniban dagiti napipigsa a lallaki, ket dadaelenna dagiti bakud a pagtaltalkanda.

²³Annadam ti panagsaritam no kayatmo nga awan ti pakaisagsagmakam.

²⁴Ipakitam kaniak ti maysa a tao a mangipagarup a ti bagina ti kasayaatan, ket ipakitak kenka ti maysa a tao a natangsit, napalangguad, ken dina bigbigen ti kabaelan ti sabali.

²⁵Ti nasadut a tao a dina kayat ti agtrabaho, patayenna met la ti bagina.

²⁶Awan ti sabali nga aramidna no di la ti panangpampanunotna iti kayatna a tagikuaen. Nupay kasta, mangted a sibubuslon ti nalinteg.

²⁷Kagura ti Apo dagiti managdakdakes nga agidatag kadagiti daton kenkuana, nangruna no dakes ti panggepda.

²⁸Awan ti mamati iti pammaneknek ti naulbod; ngem maawat ti sao ti tao a mangpanunot a naimbag kadagiti bambanag.

²⁹Ammo ti nalinteg ti ar-aramidenna saan a kas iti managdakdakes nga aginkukuna ket ipanna ti amin a kabaelanna nga agpamarang.

³⁰No makapungtot kenka ti Apo, saannaka a matulongan ti kinasirib, kinalaing ken sirmatam.

³¹Mabalinmo nga isagana dagiti kabalio a pakigubat, ngem ti Apo ti mangted iti balligi.