Read Iloko Proverbs 22 Bible Online

Proverbs 22 - Iloko bible

Proverbs 22

¹Nasaysayaat a piliem ti naimbag a nagan ngem ti kinabaknang.

²Awan paggiddiatan ti nabaknang ken ti napanglaw, agsipud ta agpadpadada a pinarsua ti Apo.

³Makita ti manakem ti dumteng a riribuk ket liklikanna, ngem sarakusoken ti saan nga agpampanunot a tao ket agbabawi kalpasanna.

⁴Agbutengka iti Apo, agpakumbabaka, ket magun-odmonto ti kinabaknang, dayaw ken atiddog a biag.

⁵No ipatpategmo ti biagmo, lissiam dagiti palab-og iti dalan a pakatnagan dagiti managdakdakes.

⁶Iruammo ti ubing iti umno a dalan ket uray inton lumakayen dinanto panawan.

⁷Tagabu dagiti nabaknang dagiti napanglaw. Umutangka ket tagabunaka ti nagpautang kenka.

⁸No agmulaka iti bukel ti kinakillo, rumusing ti didigra, ket aggibusto ti panangidadanesmo iti sabali a tao.

⁹Agparaburka ket ibingayam dagiti napanglaw iti taraonmo. Mabendisionankanto iti daytoy nga aramidmo.

¹⁰Lisiam ti tao a mangipagarup nga isu la ti nalaing, ket sumardeng ti suppiat, panagaapa ken panangpabpabain.

¹¹No nadalus ti pusom ket nasayaat ti panagsaom, agbalinto a gayyemmo ti ari.

¹²Salakniban ti Apo ti kinapudno babaen iti saanna a panangkanunong iti sao dagiti naulbod.

¹³Agyan ti nasadut a tao iti uneg ti balay. Kunana a no rummuar amangan no tukmaan ti maysa a leon.

¹⁴Maysa a palab-og ti pannakikamalala. Ipalab-ogna dagiti tattao a kapungtot ti Apo.

¹⁵Gagangay nga agaramid dagiti ubbing iti kinamaag ken dagiti awan serserbina a bambanag, ngem ti panagbaut ti mangisuro kadakuada nga agaramid iti naimbag.

¹⁶No sagutam dagiti nabaknang wenno idadanesmo dagiti napanglaw tapno bumaknangka, agbalinkanto met la a napanglaw.

¹⁷Dumngegka ket isuroka kadagiti sao dagiti masirib. Adalem dagiti pannursuroda.

¹⁸Maaddaankanto iti ragsak no malagipmo ida ken mabalinmonto met nga isasao ida.

¹⁹Kayatko nga agtalekka iti Apo, isut' gapuna nga ibagak dagitoy kenka itan.

²⁰Nangisuratak iti 30 a pagsasao nga agpaay kenka. Mangted ti tunggal maysa kadakuada iti ammo ken naimbag a pammagbaga,

²¹ket isurodaka no ania ti napaypayso a kinapudno. Kalpasanna, no maibaonka a mangbirok iti kinapudno, yawidmonto ti tumutop a sungbat.

²²Dimo gundawayan dagiti napanglaw gapu laeng ta kabaelam nga aramiden; dimo gundawayan dagiti awan gawayna a naidarum iti pangukoman.

²³Ikalinteganto ti Apo ida, ket pukawennanto ti biag dagiti dakes ti panggepna kadakuada.

²⁴Dika makigayyem kadagiti tattao a napudot ti ulona ken nalaka nga agpungtot.

²⁵Amangan no masursurom ti kababalinda ket dikanton makapagbalbaliw.

²⁶Dika agkari a sika ti sumungbat iti utang ti sabali.

²⁷No dimo mabayadan, alaendanto uray pay ti iddam.

²⁸Dimo yalis ti daan a mohon nga insaad dagiti kapuonam.

²⁹Ipakitaannak iti tao a napintas ti trabahona ket ipakitak kenka ti tao a nasaysayaat ngem ti kaaduan ken maikari a makikadua kadagiti ari.