Read Iloko Proverbs 23 Bible Online

Proverbs 23 - Iloko bible

Proverbs 23

¹No makilanglangka iti natan-ok a tao, dimo liplipatan ti kinasiasinona.

²No nalaingka a mangan, timbengem ti pannanganmo.

³Dimo aguman dagiti naimas a taraon nga ipasangona, ta mabalin nga al-allilawennaka.

⁴Agpanunotka a nalaing ket dimo bannogen ta bagim iti tarigagaymo a bumaknang.

⁵Mabalin a mapukaw ti kuartam iti apagdarikmat a kasla ketdin naaddaan iti payak ket tumayab a kasla agila.

⁶Dika makilanglang iti nakirmet a tao wenno aguman dagiti naimas a taraon nga idasarna.

⁷“Mangalaka pay,” kunana ngem aginkukuna laeng. No ania ti pampanunotenna, isu ti pudno a kinataona.

⁸Isarruamto ti kinnanmo ket awanto ti serserbi ti panagpatiray-okmo.

⁹Dika agsao iti nainsiriban iti maysa a maag, ta dina ammo nga ipateg ti sao.

¹⁰Dimo yalis ti daan a mohon ti daga wenno sakupen ti talon a kukua dagiti ulila.

¹¹Ti Apo ti napigsa a mangikaluya kadakuada ket isunto ti mangirupir iti kalinteganda a maibusor kenka.

¹²Ipasnekmo ti dumngeg iti sursuro ken tagikuaem ti pudno nga adal.

¹³Dika bumdeng a mangdisiplina iti ubing. Saanna nga ipatay ti panangbautmo kenkuana.

¹⁴Kinapudnona, mabalin a daytoy ti pakaisalakanan ti biagna.

¹⁵Anakko, no agbalinka a masirib, maragsakanakto la unay.

¹⁶Agrag-oakto no mangngegka nga agsao kadagiti nainsiriban a balikas.

¹⁷Dimo apalan dagiti managbasol: ti panagraemmo iti Apo ti ad-adda koma a pakaseknam.

¹⁸No kasta ti aramidem, nasayaatto ti masakbayam.

¹⁹Dumngegka, anakko; agsiribka ket panunotem a naimbag ti panagbiagmo.

²⁰Dika kumuyog kadagiti mammartek wenno kadagiti narawet.

²¹Agbalinto a marigrigat dagiti mammartek ken dagiti buklis. No mangan ken maturog laeng ti aramidmo, agrutayrutaykanto.

²²Ipangagmo ni amam a nangputot kenka ken dimo uyawen ti kinabaket ni inam.

²³Kinapudno, kinasirib, sursuro ken naimbag a nakem—maikarida a paggastoan ngem napategda unay ket dimo kayat nga ilako.

²⁴Maragsakan unay ti ama ti nalinteg nga anak. Mabalinmo a pagpannakkel ti masirib nga anakmo.

²⁵Pagtangsitdaka koma dagiti nagannak kenka. Ipaaymo dayta a ragsak iti inam.

²⁶Anakko, tantandaanam ti saok ket pagulidanam ti panagbiagko.

²⁷Nakabutbuteng a palab-og ti kayarigan dagiti balangkantis ken dakes a babbai.

²⁸Kasda la mannanakaw nga agsaneb ket isuda ti pakaigapuan ti pananggulib dagiti lallaki kadagiti assawada.

²⁹Ipakitam kaniak ti tao a nalaing nga uminum ti arak, ti tao a mangpadas kadagiti nasanger nga inumen, ket ipakitak kenka ti maysa a tao a naliday ken mangay-ay iti bagina, kanayon a makiringgor ken managreklamo. Nalablabbaga ti matana ket adda dagiti dunorna a nalisianna koma.

³¹Dika pasulisog iti arak, uray no kasta unay ti labbagana, ket nasin-aw iti uneg ti kopa ken nalamuyot a tilmonen.

³²Ngem iti kabigatanna, kaska la kinagat ti nagita nga uleg.

³³Kalpasanna, agparang kenka dagiti nakabutbuteng a buya ket saan a nalawag ti panagpanunotmo ken panagsaom.

³⁴Kaska la adda iti taaw a mayallo-allon, maul-ulawka ket kaska la adda iti palo ti maibagbagio a barko.

³⁵Kunamto, “Kinabildak sa. Pinang-ordak ngata ngem diak malagip. Apay a diak makariing? Uminumak pay maminsan.”