Read Iloko Proverbs 24 Bible Online

Proverbs 24 - Iloko bible

Proverbs 24

¹Dimo apalan dagiti managdakdakes ket dimo tarigagayan ti makigayyem kadakuada.

²Ta pampanunotenda laeng ti mangriribuk, ket tunggal agsaoda adda mapasakitan.

³Mabangon dagiti balbalay iti kinasirib ken pannakaawat.

⁴No sadino ti ayan ti pannakaammo mapunno dagiti kuartona kadagiti agkakapateg ken agkakapintas a bambanag.

⁵Nasaysayaat ti masirib ngem ti napigsa; wen, naim-imbag ti ammo ngem ti pigsa.

⁶Kinaagpaysona, masapul nga adda naannad a panagplano sakbay a mapanka iti paggugubatan, ket no ad-adu ti naimbag a pammagbaga, dakdakkel ti namnama ti panagballigi.

⁷Saan a maawatan ti maag dagiti nainsiriban a pagsasao. Saanna a mabalin ti makipartisipar kadagiti importante a pagsasaritaan.

⁸No kanayon nga agpanggepka iti dakes, agdindinamagkanto a manangriribuk.

⁹Basol ti aniaman a panggep ti maag. Kagura dagiti tattao ti tao a mangipagarup nga isu laeng ti nalaing.

¹⁰No nakapuyka iti tiempo ti riribuk, awan duadua a nakapsutka.

¹¹Dika bumdeng a mangispal iti tao a mapapatay nga awan gapgapuna.

¹²Nalabit a kunam nga awan bibiangmo, ngem ammo ti Dios ti adda iti panunotmo ket ammona dagiti panggepmo, ta kanayon a sipsiputannaka. Supapakanna dagiti tattao kadagiti aramidda.

¹³Anakko, manganka iti diro ta pagsayaatam. Kas iti diro a maala iti rara a nasam-it iti panagramanmo,

¹⁴kasta met a ti ammo ken sirib pagsayaatan ti kararua. Ikagumaam ti maaddaan iti kinasirib ket naraniagto ti masakbayam.

¹⁵Dimo panggepen a takawan ti nalinteg a tao wenno agawen ti balayna. Dakes ti kasta nga aramid.

¹⁶Uray no mamin-ano a matuang ti nalinteg, bumangon latta. Ngem dadaelen ti didigra ti managdakdakes.

¹⁷Dika agragsak no madidigra ti kabusormo ket dika met agrag-o no maitibkol.

¹⁸Ammo ti Apo, ket dina kayat ti aramidmo. Dinanto pay ket patuloyenen a dusaen.

¹⁹Dimo ipalubos a mariribukka gapu kadagiti managdakdakes ken dimo apalan ida.

²⁰Awan ti masakbayan ti dakes a tao, ket awan namnamaenna.

²¹Anakko, agbutengka iti Apo ken agraemka iti ari. Dika makibiang kadagiti mangsukir kadakuada.

²²Saan a mamin-ano a madadael dagiti kakasta a tattao. Ammom kadi ti didigra a mabalin nga idissuor ti Dios wenno ti ari?

²³Sao met dagiti masirib a tattao dagitoy: Saan a nasayaat a mangidumduma ti ukom.

²⁴No ikeddengna a nakabasol ti awan basolna, ilunod ken guraento ti tunggal maysa.

²⁵Ngem rumang-ay ken nasayaatto ti pakasarsaritaan dagiti ukom a mangdusa kadagiti nakabasol.

²⁶Ti mangted iti tumutop a sungbat, arigna iti panangagek iti bibig.

²⁷Sakbay nga agbalay ken mangasawaka, isaganam pay nga umuna ti talonmo ken sumapulka iti panggeddam.

²⁸Dika agsaksi iti maibusor iti kaarrubam no awan ti gapuna wenno agsao iti maibusor kenkuana.

²⁹Dimo kunaen, “Aramidek kenkuana ti inaramidna kaniak tapno makabalesak!”

³⁰Nagnaak iti talon ken kaubasan ti nasadut ken maag a tao.

³¹Nasaknapandan kadagiti sisiitan ken nagkaruotanen. Nargaay metten ti bakudda a bato.

³²Kinitak daytoy ken pinampanunotko, ket daytoy ti naadalko:

³³Ala, agiddaka; maturogka latta. Agdalikepkepka ken aginanaka,

³⁴ngem bayat ti pannaturogmo, dumteng kenka ti kinapanglaw a kas iti idadateng ti siaarmas a mannanakaw.