Read Iloko Proverbs 25 Bible Online

Proverbs 25 - Iloko bible

Proverbs 25

¹Dagitoy pay dagiti nainsiriban a sao ni Solomon. Kinopia dagiti tattao iti pangukoman ni Ezekias nga ari ti Juda.

²Dayawentayo ti Dios kadagiti ilimlimedna; raementayo met dagiti ari gapu kadagiti ilawlawagda.

³Ditay ammo ti pampanunoten ti ari, ta nangato a kas iti langit wenno nauneg a kas iti taaw.

⁴No naikkaten ti rituer ti pirak, mabalin ti mammanday ti mangpartuat iti maysa a banag a napintas.

⁵Papanawem dagiti dakes a mammagbaga ti ari, ket agdinamagto ti kinalinteg iti pagarianna.

⁶No dumatagka iti sangoanan ti ari, dika agpamarang a kasla importante a tao.

⁷Nasaysayaat a maibaga kenka nga akmem ti nangatngato a saad ngem ti maibaga kenka nga itedmo ti saadmo iti tao a nangatngato ngem sika.

⁸Dika agdardarasudos a mangipakaammo iti pangukoman ti maipapan iti nakitam. No addanto saksi a mangpaneknek a nagriroka, dika aya maibabain?

⁹No adda saanyo a pagkinnaawatan iti kaarrubam, aglinnawagkayo a dakdakayo ngem dimo ipalgak ti aniaman a palimed.

¹⁰Ta no kasta ti aramidem, maammoanto ti amin a dika makailemmeng iti palimed, ket dinto maikkat ti pannakaibabainmo.

¹¹Ti sao a nasayaat ti pannakayebkasna mayarig iti balitok a naimontar iti pirak.

¹²Napatpateg ngem ti singsing a balitok wenno alahas a naaramid iti kasayaatan a balitok ti ballaag ti tao a masirib iti siasinoman a sisasagana a dumngeg.

¹³Makapabang-ar ti matalek a babaonen iti mangibaon kenkuana, kas iti nalamiis a danum iti kapudot ti panagani.

¹⁴Mayarig iti ulep ken angin a di mangyeg iti tudo dagiti tattao nga agkari a mangted ngem dida met ited ti inkarida.

¹⁵Ti naanus a panangallukoy mabalinna a parukmaen ti napinget nga isusuppiat, ket maguyugoyna pay dagiti agtuturay.

¹⁶Dimo palaloan ti mangan iti diro amangan no agsarruaka.

¹⁷Dika sarungkar a sarungkar iti kaarrubam, amangan no mauma ket kaguranaka.

¹⁸Ti pammadpadakes, arigna iti natadem a kampilan wenno pang-or wenno natirad a pana.

¹⁹Ti agtalek iti mangliliput a tao iti tiempo ti riribuk, mayarig iti panagngalngal babaen iti agwaliwali a ngipen wenno pannagna babaen iti nablo a saka.

²⁰Mayarig iti pananguksob iti kawes iti tiempo ti lam-ek wenno panangradrad ti sugat iti asin ti panangkanta kadagiti naragsak a kanta iti tao a madagdagsenan.

²¹Pakanem ti kabusormo no mabisin, ken painumem no mawaw,

²²tapno malmes iti bain, ket gunggonaannakanto ti Apo.

²³Ti panagpardaya yegna ti pungtot, kas iti angin nga awan duadua a mangyeg iti tudo.

²⁴Nasaysayaat ti agnaed iti tuktok ti balay, ngem ti makipagnaed iti asawa a managunget ken managreklamo.

²⁵Ti pannakangngeg iti naimbag a damag manipud iti adayo a daga, mayarig iti nalamiis a danum no namaga ti karabukob ken mawawka.

²⁶Ti naimbag a tao a sumurot iti pagayatan ti managdakdakes, ipalagipna kenka ti narugit nga ubbog wenno nasabidongan a bubon.

²⁷Saan a naimbag ti mangan iti adu unay a diro, ken saan met a naimbag a gun-oden ti adu a pammadayaw.

²⁸No dimo matengngel ti pungtotmo, mayarigka iti siudad nga awan bakudna ket nalaka a rauten dagiti kabusor.