Read Iloko Proverbs 27 Bible Online

Proverbs 27 - Iloko bible

Proverbs 27

¹Dimo pagpasindayag ti masakbayan. Dimo ammo ti mapasamak manipud ita agingga no bigat.

²Bay-am a ti sabali a tao ti mangidayaw kenka—uray ganggannaet. Dimo itan-ok ti bukodmo a bagi.

³Nalag-an ti bato ken darat no idilig iti dagsen ti parikut nga ited ti kinamaag.

⁴Naranggas ken nadawel ti pungtot, ngem nakarkaro pay ti imon.

⁵Nasaysayaat ti napanayag a panagtubngar ngem ti nalimed a panangipateg.

⁶Naimbag ti panggep ti maysa a gayyem uray no mapasakitannaka. Ngem no sallabayennaka ti kabusor—agannadka!

⁷No nabsog ti tao, dina kayat ti diro, ngem no mabisin, uray ti napait a taraon nasam-it latta kenkuana.

⁸Ti tao nga adayo iti pagtaenganna, mayarig iti billit nga adayo iti umokna.

⁹Paragsakennaka ti bangbanglo ken nabanglo a lana, ket ti nasinged a pannakigayyem paregtaennaka.

¹⁰Dimo liplipatan dagiti gagayyemmo wenno dagiti gagayyem ni tatangmo. No adda parikutmo, dika agpatulong iti kabsatmo. Ad-adu ti maitulong ti kaarrubam nga adda iti asidegmo ngem ti kabsatmo nga adda iti adayo.

¹¹Agsiribka, anakko, ket maragsakanakto. Addanto maisungbatko kadagiti mangbabalaw kaniak.

¹²Makita ti manakem ti umay a riribuk ket liklikanna, ngem sumarakusok ti gagangay a tao ket pagbabawiannanto iti kamaudianna.

¹³Siasinoman a maag a mangikari nga isu ti sumungbat iti utang ti maysa a ganggannaet, masapul a matengngel ti sanikuana a kas salda tapno mabayadan ti utang.

¹⁴No kablaawam ti maysa a gayyem iti napigsa tapno makariing, kasmo la inlunoden.

¹⁵Ti naunget ken managreklamo nga asawa awan dumana iti aldaw a di agressat ti tudona.

¹⁶Kasano a pagulimekem? Napadasmo kadin a pasardengen ti angin wenno mangiggem iti sangkabassit a lana?

¹⁷Makasursuro ti tao iti padana a tao kas iti panangpatadem ti landok iti sabali a landok.

¹⁸Aywanam a naimbag ti igos ket mangankanto iti bungana. Maidaydayawto ti adipen nga agserbi a siaayat iti amongna.

¹⁹Ti bukodmo a rupa ti maanninawam iti danum ket ti kinataom ti makitam iti pusom.

²⁰Mayarig dagiti tarigagay ti tao iti lubong dagiti natay—adda latta pagyanan.

²¹Ti apuy ti manggugor iti pirak ken balitok. Matingiting met ti tao gapu iti pakasarsaritaanna.

²²Uray kabilem ti maag agingga a dandani matay, dimo maikkat ti kinamaagna.

²³Aywanam a nalaing dagiti karnero ken bakam,

²⁴agsipud ta saan nga agpaut ti kinabaknang. Uray dagiti nasion saanda nga agtalinaed iti agnanayon.

²⁵Patpatem ti garami, kalpasanna patpatem met dagiti ruot kadagiti bakras ti turod bayat ti panagdakkel dagiti sumaruno nga apit a garami.

²⁶Makaabelkanto kadagiti pagan-anaymo iti dutdot dagiti karnerom. Makagatangkanto iti talon iti kuarta a naglakoam kadagiti dadduma a kaldingmo.

²⁷Dagiti dadduma a kalding ti pagtaudanto iti gatas nga agpaay a taraonmo, agraman ti familiam ken dagiti adipenmo a babbai.