Read Iloko Proverbs 28 Bible Online

Proverbs 28 - Iloko bible

Proverbs 28

¹Agtaray ti managdakdakes uray awan kumamkamat kenkuana, ngem ti nalinteg natured a kas iti leon.

²Napigsa ken natalged ti nasion no addaan kadagiti masirib ken mannakaawat a pangulo. Ngem no agbasol ti maysa a nasion masukansukat dagiti pangulona.

³Ti agturay a mangidadanes kadagiti napanglaw, mayarig iti bumayakabak a tudo a mangdadael kadagiti mula.

⁴No dimo bigbigen ti linteg, kaduam dagiti managdakdakes, ngem no tungpalem ti linteg busorem ida.

⁵Saan a maawatan dagiti managdakdakes ti hustisia, ngem maawatan dagiti agdaydayaw ken ni Yahweh.

⁶Nasaysayaat ti napanglaw nga awan pakasarsaritaanna, ngem ti nabaknang a dakes ti panagbiagna.

⁷Masirib nga agtutubo ti mangtungpal iti linteg. Ti makikadua kadagiti awan serserbina a tattao, pakaibabainan ti amana.

⁸No bumaknangka babaen iti panagpaanakmo iti pirak ken pananggundawaymo kadagiti tao, maitedto ti kinabaknangmo iti tao a naasi kadagiti napanglaw.

⁹No dika agtungpal iti linteg, makarimon iti Dios dagiti kararagmo.

¹⁰No sulisogem ti nalinteg a tao nga agaramid iti dakes, sika met laeng ti matnag iti palab-ogmo. Magunggonaanto a naimbag dagiti awan basolna.

¹¹Ipagarup dagiti nabaknang a masiribda, ngem ad-adu ti ammo ti napanglaw nga adda sirmatana.

¹²No agturay ti nalinteg a tao, agrarambak dagiti umili, ngem aglemmengda no dagiti nadangkes ti agturay.

¹³Pulos a dikanto agballigi no padasem nga ilemmeng dagiti basolmo. Ipudnom ida ken agbabawika, ket kaasiannakanto ti Dios.

¹⁴Agbutengka a kanayon iti Apo, ket naragsakkanto. No natangken ti ulom, madadaelkanto.

¹⁵Nakakaasi dagiti napanglaw a bumusor iti dakes nga agturay. Narungsot a kas iti ngumerngernger a leon wenno agdakdakiwas nga oso.

¹⁶Naranggas ti agturay nga awan naimbag a panunotna. Atiddog ti panagturay ti gumura iti dakes.

¹⁷Ti tao a pimmatay iti padana a tao, agkalkali iti bukodna a tanem. Dimo paspasardengen.

¹⁸Dika agsasaur ket awanto ti pakaan-anoam. Agsaurka ket dikanto agballigi.

¹⁹Adunto ti taraon ti nagaget a mannalon, ngem napanglawto latta dagiti mangdaddadael iti tiempona.

²⁰Ti tao a di agsaur, agturong iti naan-anay ken naragsak a biag. Ngem no gumanatka a bumaknang, madusakanto.

²¹Saan a naimbag ti panangidumduma. Ngem agbasol dagiti dadduma nga ukom nga umawat uray iti kabassitan a pasuksok.

²²Gumanat a bumaknang ti nakirmet a tao, ket dina ammo ti kanito nga idadateng ti kinapanglaw.

²³Tubngarem ti maysa a tao ket ad-addanto nga ipategna ti inaramidmo ngem ti panangpatiray-okmo kenkuana.

²⁴No ipagarupmo a saan a biddut ti panangtakawmo iti sanikua dagiti nagannak kenka, awan dumam iti gagangay a mannanakaw.

²⁵Riribuk ti patauden ti kinaimut. Narangrang-ayka no agtalekka iti Apo.

²⁶Kinamaag ti agtalek iti bukod a kapanunotan. Natalgedka no surotem ti pannursuro dagiti masirib.

²⁷Mangtedka kadagiti napanglaw ket awanto ti pagkurangam. Ngem no dika mangngaasi, adunto ti mangilunod kenka.

²⁸No agturay dagiti managdakdakes, aglemmeng dagiti tattao. Ngem no maikkatda, agturay manen dagiti nalinteg.