Read Iloko Proverbs 29 Bible Online

Proverbs 29 - Iloko bible

Proverbs 29

¹No sumuksukirka tunggal mababalawka, addanto aldaw a maitibkolka ket saankanton a makabangon.

²Ipakitam kaniak ti agturay a nalinteg, ket ipakitak kenka dagiti naragsak a tattao. Ipakitam kaniak ti agturay a managdakdakes, ket ipakitak kenka dagiti saan a naragsak a tattao.

³No patiem ti kinasirib, ipagpannakkelnaka ni amam. Maysa a kinamaag ti mangbusbos iti kuartana kadagiti balangkantis a babbai.

⁴No kinalinteg ti pakaringgoran ti ari, napigsa ti pagilian, ngem no ti la kuarta ti ipangpangrunana dadaelenna ti dagana.

⁵No patiray-okam dagiti gagayyemmo, agaramidka iti pakasiloan ti bukod a sakam.

⁶Masiloan dagiti managdakdakes kadagiti basbasolda met laeng, ngem naragsak ken siwawaya dagiti nalinteg.

⁷Ammo ti naimbag a tao ti kalintegan ti napanglaw, ngem saan a maawatan dagiti managdakdakes dagita a bambanag.

⁸Dagiti tattao a saan a mangbigbig iti kalintegan ti padada a tao kabaelanda a riribuken ti entero a siudad. Pagtalnaen dagiti masirib dagiti amin a banag.

⁹No idarum ti masirib ti maysa a maag, agkatawa laeng ti maag, ket ageskandalo ken makisubang.

¹⁰Kagura dagiti mammapatay ti tao a saan nga agsasaur, ngem salakniban dagiti nalinteg ti kasta a tao.

¹¹Bulosan ti maag ti pungtotna, ngem naanus ti masirib ket tenglenna ti riknana.

¹²No ipangag ti agturay ti saan a pudno a damag, ulbod dagiti amin nga ofisialesna.

¹³Adda pagpadaan ti napanglaw ken ti mangidadanes kenkuana: agpadada nga inikkan ni Yahweh iti mata.

¹⁴No salakniban ti ari ti kalintegan dagiti napanglaw, mabayagto ti panagturayna.

¹⁵Pagimbagan dagiti ubbing ti panangisuro ken panangdisiplina. No mabaybay-an ti ubing nga agaramid iti kaykayatna, ibabainnanto ti inana.

¹⁶No agturay dagiti managdakdakes, umadu ti basol. Ngem maimatanganto dagiti nalinteg ti pannakarpuogda.

¹⁷Disiplinaam ti anakmo a lalaki ket mabalinmonto nga ipagpannakkel. Saannakanto nga ikkan iti pakaibabainam.

¹⁸No saan nga idalan ti Dios ti maysa a nasion, awan urnos ti pagilian. Nagasat ti tao a mangsalimetmet iti linteg ti Dios!

¹⁹Dimo madisiplinaan ti adipen babaen iti sao laeng. Nalabit a maawatannaka, ngem dinaka patpatien.

²⁰Dakdakkel ti namnama ti nengneng a maag, ngem ti tao a dina panunoten nga umuna ti isawangna.

²¹No itedmo ti amin a kayat ti adipenmo manipud kinaubingna, dumtengto ti tiempo nga alaenna amin a sanikuam.

²²Ti tao a nalaka nga agpungtot pataudenna ti ringgor ken riribuk.

²³Ti kinatangsit ti tao isut' mangipababa kenkuana, ngem mararaem no napakumbaba.

²⁴Ti kadua ti mannanakaw kagurana ti biagna. Ammona dagiti panangilunod, ngem awan ti ipudnona.

²⁵Ti buteng isu ti pakadadaelam, ngem no agtalekka iti Apo, awan ti pakaan-anoam.

²⁶Kayat ti tunggal maysa a gun-oden ti naimbag a nakem ti agturay, ngem ti Apo laeng ti pakagun-odam iti kinalinteg.

²⁷Guraen dagiti nalinteg a tao dagiti managdakdakes. Guraen met dagiti managdakdakes dagiti nalinteg.