Read Iloko Proverbs 30 Bible Online

Proverbs 30 - Iloko bible

Proverbs 30

¹Dagitoy dagiti sao ni Agur nga anak ni Jakeh: “Awan ti Dios kaniak, awan ti Dios kaniak, ket nakakaasiak.

²Umas-aspingakon iti animal ket saan a kas tao; awan kaniak ti panunot nga adda koma iti tao.

³Awan nasursurok a kinasirib, ket awan ammok maipapan iti Dios.

⁴Siasino ti nakagun-oden iti nailangitan a pannakaammo? Siasino ti nakaiggemen iti angin? Siasino ti nakabungonen iti danum iti lupot? Siasino ti nakaipasdeken kadagiti beddeng ti daga? Ammom no siasino? Siasino ti anakna a lalaki?

⁵“Tungpalen ti Dios ti amin a karina. Mayarig iti kalasag kadagiti amin nga agbirok iti panangsalaknibna.

⁶Dimo nayonan ti saona amangan no tubngarennaka ket maduktalan nga ulbodka.”

⁷Adda dua a banag a dawatek kenka, O Dios, sakbay a matayak:

⁸dimo ipalubos nga agulbodak ken saanak koma a napanglaw wenno baknang. Ti laeng umanay a taraonko ti itedmo.

⁹No adu ti sanikuak, amangan no ibagak a saankan a masapul. Ngem no napanglawak, amangan no agtakawak ket ibabainko ti nagan ti Diosko.

¹⁰Dimo padpadaksen ti adipen iti apona amangan no ilunodnaka ket agsagabaka.

¹¹Adda dagiti tattao a mangilunod kadagiti ammada ket awan a pulos panagraemda kadagiti innada.

¹²Adda dagiti tattao a mangipagarup a nadalus ti biagda idinto nga iti kinapudnona, kasta unay ti kinarugitda.

¹³Adda dagiti tattao a mangipagarup a naimbagda—ket anian a nagimbag ti panangipagarupda kadagiti bagbagida!

¹⁴Adda dagiti tattao a sirurungsot a manggundaway kadagiti napanglaw ken nakakaasi—kasta ti pagsapulanda.

¹⁵Adda dua a babbai nga annak ti alimatek, ket napanagananda a dua iti “Ikkannak!” Adda tallo a pulos a di mapnek; uppat a saan nga agkuna, “Huston:”

¹⁶ti lubong dagiti natay, ti babai nga awan annakna, ti natikag a daga a makasapul iti tudo, ken ti apuy a saan nga agkuna, “Huston.”

¹⁷Ti tao a manglais iti amana wenno mangumsi iti kinabaket ti inana, rumbeng a maipakan kadagiti agila wenno tuktoken dagiti narungsot a wak ti matana.

¹⁸Adda tallo a datdatlag kaniak; wen, uppat a diak maawatan:

¹⁹ti agila nga agtaytayab iti tangatang, ti panaguyas ti uleg iti bato, ti panaglasat ti barko iti taaw, ti panaginnayat ti baro ken ti balasang.

²⁰Kastoy ti aramid ti babai a saan a napudno iti asawana: makikamalala, agdigos, ket ibagana nga awan dakes nga aramidna.

²¹Adda tallo a pagbutngan ti daga; wen, uppat a saan a maanusan:

²²ti tagabu nga agbalin nga ari, ti maag nga addaan iti amin a kayatna a kanen,

²³ti saan a maipatpateg a babai a makiasawa, ken ti adipen a babai nga asawaen ti amongna.

²⁴Adda uppat a babassit nga animal ditoy lubong, ngem nakasirsiribda:

²⁵Dagiti kuton: nakapsutda ngem agurnongda iti taraonda iti kalgaw.

²⁶Dagiti koneho: nakapsutda met ngem agbalayda kadagiti rangkis.

²⁷Dagiti dudon: awan arida ngem naurnos ti panaggunayda.

²⁸Dagiti alutiit: mabalinmo a tiliwen ngem masarakam ida kadagiti palasio.

²⁹Adda tallo a nadaeg ti pannagnada; wen, uppat a nataraki ti panagaksawda:

³⁰ti leon a kapigsaan kadagiti animal ken pulos nga awanan buteng,

³¹dagiti kalding, dagiti nataraki a kawitan, ken dagiti ari iti sangoanan dagiti tattaona.

³²No kaska la maag a natangsit, ket adda dakes a panggepmo, sumardengka ket agpanunotka!

³³Batilem ti gatas, ket maaddaanka iti mantikilia. Danogem ti agong ti maysa a tao ket agdara. Pataudem ti riribuk ket maisagmakka.