Read Iloko Proverbs 31 Bible Online

Proverbs 31 - Iloko bible

Proverbs 31

¹Dagitoy ti pammagbaga ti ina iti anakna a ni Ari Lemuel:

²“Sika ti dungdungngoek nga anak, ti sungbat dagiti kararagko. Ania ti ibagak kenka?

³Dimo ibusen ti pigsam kadagiti babbai, wenno busbosen ti kuartam kadakuada; adun ti dinadaelda nga ari.

⁴Lemuel, denggem. Saan a rumbeng nga uminum dagiti ari iti arak, wenno agtarigagay nga uminum iti naingel.

⁵No uminumda, malipatanda dagiti linteg, ket dida bigbigen ti kalintegan dagiti tattao a nakurapay.

⁶Agpaay kadagiti agbugbugsot ti naingel nga inumen, wen, agpaay kadagiti nakaay-ay-ay.

⁷Palubosam ida nga uminum tapno malipatanda ti kinapanglawda ken ti kaawan ragsakda.

⁸“Ikalintegam dagiti tattao a saan a makabael a mangikalintegan kadagiti bagbagida. Dimo ipalubos a maikkat ti kalintegan dagiti amin nga awan gawayna.

⁹Ikalintegam ida ket agbalinka a nalinteg nga ukom. Ikalintegam dagiti napanglaw ken dagiti marigrigat.”

¹⁰Nagrigat ketdin ti sumapul iti asawa a babai a makabael iti pagrebbenganna! Napatpateg nga adayo ngem iti alahas.

¹¹Dakkel ti panagtalek ti asawana kenkuana, ket pulos a dinto pumanglaw.

¹²Bayat ti panagbiagna, naimbag ti ipaayna iti asawana ket pulos a dina dangran.

¹³Ipamaysana ti agaramid iti linen ken de lana a lupot.

¹⁴Agisangpet kadagiti taraon nga aggapu iti adayo a lugar, a kas iti panagisangpet ti barko dagiti komersiante.

¹⁵Nariwet pay no bumangon tapno isaganana ti taraon ti familiana ken ibagana ti aramiden dagiti babbai nga adipenna.

¹⁶Agbirok iti daga ket gatangenna babaen iti kuarta a nateggedanna sana mulaan iti ubas.

¹⁷Naanep nga agtrabaho, napigsa ken nagaget.

¹⁸Ammona ti pateg ti amin nga ar-aramidenna, ket agtrabaho agingga iti rabii.

¹⁹Agtibbi ket ablenna ti bukodna a pagan-anay.

²⁰Naparabur kadagiti napanglaw ken marigrigat.

²¹Saan a madanagan uray no nalam-ek ta adda naimeng a pagan-anay ti familiana.

²²Agaramid kadagiti abbong ti katre, ken napintas a linen dagiti pagan-anayna.

²³Agdindinamag ti asawana—maysa kadagiti mabigbigbig nga umili.

²⁴Agaramid kadagiti pagan-anay ken barikes sana ilako kadagiti agtagtagilako.

²⁵Natalged ken madaydayaw ti kasasaadna, ket awan pagdanaganna iti masakbayan.

²⁶Naanus ti panagsaona ket nainsiriban dagiti ibagana.

²⁷Kanayon nga adda aramidenna ket kitaenna dagiti kasapulan ti familiana.

²⁸Ipakita dagiti annakna ti panangdayawda kenkuana, kasta met ti asawana.

²⁹Kuna ti asawana, “Adu ti naimbag nga assawa ngem artapam amin ida.”

³⁰Makaallilaw dagiti naimnas a saguday ti maysa a tao, ket agkupas ti kinapintas, ngem masapul a maidaydayaw ti babai nga agbuteng ken ni Yahweh.

³¹Rumbeng a mabigbig ken maitan-ok kadagiti amin nga aramidna, ket maikari a raemen ti tunggal maysa.