Read Iloko Proverbs 4 Bible Online

Proverbs 4 - Iloko bible

Proverbs 4

¹Annakko, ipangagyo ti pannursuro ni amayo. Imdenganyo a nalaing ket maaddaankayto iti pannakaawat.

²Naimbag ti isursurok kadakayo, isut' gapuna a laglagipenyo amin ida.

³Idi ubingak pay laeng—maysaak a bugbugtong nga anak—

⁴isursuronak idi ni amak ket kunkunana: “Dimo liplipatan dagiti saok. Tungpalem dagiti bilinko ket agbiagkanto.

⁵Gun-odem ti kinasirib ken sirmata. Dimo liplipatan dagiti ibagbagak.

⁶Dimo baybay-an ti kinasirib ket salaknibannakanto; ayatem ket aywanannakanto.

⁷Kangrunaan unay ti pananggun-odmo iti kinasirib. Ipanmo ti amin a kabaelam a manggun-od iti pannakaawat.

⁸Ipategmo ti kinasirib ket itan-oknakanto. Awatem ket idaydayawnakanto.

⁹Tinto kinasirib ti nadayag a balangatmo.”

¹⁰Denggennak, anakko. Ipapusom dagiti saok tapno atiddogto ti panagbiagmo.

¹¹Insurok kenka ti kinasirib ken ti rumbeng a panagbiag.

¹²Awanto ti manglapped iti dalanmo no magnaka a nainsiriban. No agtarayka, saankanto a maitikleb.

¹³Laglagipem a kankanayon ti inadalmo. Ti adalmo isut' biagmo—aluadam a naimbag.

¹⁴Dika magna iti dalan dagiti managdakdakes. Dimo tuladen ti aramid dagiti nakillo.

¹⁵Dika agaramid iti dakes! Liklikam! Laksidem ket inka iti papanam.

¹⁶Saan a makaturog dagiti managdakdakes no dida makaaramid iti dakes. Agiddada a siririing no awan pay rinanggasanda.

¹⁷Pannakatinapay ken pannadanumda ti kinadakes ken kinaranggas.

¹⁸Mayarig iti bannawag ti dalan a pagnaan dagiti nalinteg. Rumaniag a rumaniag agingga a makatangkayagen ti init.

¹⁹Ngem nasipnget a kas iti rabii ti dalan dagiti managdakdakes. Maitiklebda ngem dida makita no ania ti nakaitibkolanda.

²⁰Anakko, imdengam dagiti saok. Denggem dagiti pammagbagak.

²¹Tantandaam ket ipategmo ida.

²²Ta dagitoy ti mangted iti biag ken salun-at iti siasinoman a makaawat kadakuada.

²³Annadam ti panagpampanunotmo. Ti pampanunotem ti mangikeddeng iti panagbiagmo.

²⁴Dika agsasao iti saan a pudno. Dika agul-ulbod ken liklikam dagiti makaallilaw a sao.

²⁵Kitaem a situtured ti masangoanam. Dika agdumdumog gapu iti bainmo.

²⁶Planoem a nalaing ti aramidem, ket agbanagto a naimbag ti aniaman nga aramidem.

²⁷Liklikam ti kinadakes ket magnaka iti nalinteg a dalan. Dika sumiasi iti tumutop a pagnaan.