Read Iloko Proverbs 5 Bible Online

Proverbs 5 - Iloko bible

Proverbs 5

¹Anakko, dumngegka ket ipangagmo ti kinasirib ken sirmatak.

²No aramidem ti kasta, naimbagto ti kababalinmo, ket ipakitanto dagiti balikasmo nga adda sursurom.

³Mabalin a nasam-it a kas diro ti bibig ti asawa ti sabali a lalaki, ken nalamuyot a kas lana ti olibo dagiti agekna.

⁴Ngem inton malpasen ti amin awan ti ibatina kenka no di la pait ken saem.

⁵Ipannakanto iti lubong dagiti natay. Magna iti dalan nga agturong ken patay.

⁶Saan nga agtalinaed iti dalan ti biag. Sumiasi ngem saanna nga ammo ti mapaspasamak.

⁷Ita, annakko, denggendak, ket diyo liplipatan ti ibagak.

⁸Adaywanyo ti kasta a babai! Dikay umasideg uray la no iti ruangan ti balayna!

⁹No aramidenyo latta daytoy, sublatento dagiti dadduma ti dayaw nga adda idi kadakayo. Ubbingkayto pay a patayen dagiti naranggas a tattao.

¹⁰Wen, alaento dagiti ganggannaet ti amin a sanikuayo ket tagikuaento ti sabali ti nagbannoganyo.

¹¹Pagbanaganna, agas-asugkayto a matay iti iddayo. Marunotto dagiti lasag ken piskelyo.

¹²Kunayonto, “Apay a diak la nakasursuro? Apay a diak kinayat ti patubngar?

¹³Diak impangpangag dagiti mamaestrok. Diak inkaskaso ida.

¹⁴Idi agbalawakon, nasarakak laengen ti bagik a naibabain iti imatang ti publiko.”

¹⁵Napudnoka koma iti asawam ket isu laeng ti pangibukbokam iti ayatmo.

¹⁶Awan imbag a maited kenka dagiti annakmo iti ruar.

¹⁷Dumakkel koma dagiti annakmo tapno tulongandaka, a saan ketdi a dagiti ganggannaet.

¹⁸Ngarud, ti asawam ti pagragsakam ket sarakem ti rag-o iti babai nga inkasarmo.

¹⁹Napintas ti asawam ken naparagsit a kas iti ugsa. Paragsakennaka koma dagiti makaawis a sagudayna, ket lapunosennaka iti ayatna.

²⁰Anakko, apay a pakayawanka iti sabali a babai? Apay a kaykayatmo ti pangaw-awis ti asawa ti sabali a lalaki?

²¹Makita ti Apo ti amin nga aramidmo. Sipsiputannaka iti sadinoman a papanam.

²²Matiliw ti managdakdakes iti kinadakesna, ket ti bunga ti basolna ti mangipalab-og kenkuana.

²³Matay gapu ta dina ammo a saluadan ti bagina. Ti kinamaagna ti mangipanto kenkuana iti tanemna.