Read Iloko Proverbs 6 Bible Online

Proverbs 6 - Iloko bible

Proverbs 6

¹Anakko, inkarim kadi a sika ti sumungbat iti utang ti sabali?

²Natiliwanka kadin gapu iti saom, ket nasiloanka gapu kadagiti karim?

³No kasta, anakko, addaka iti pannakabalin dayta a tao ngem kastoy ti aramidem tapno mailisika: dagusem ti mapan kenkuana ket agpakpakaasika a wayawayaannaka.

⁴Dimo ipalubos a makaturogka wenno aginanaka.

⁵Lumapsutka iti silo a kas iti tumatayab, wenno ugsa nga itartarayanna ti mangnganup.

⁶Rumbeng nga adalen dagiti nasadut a tattao ti panagbiag dagiti kuton.

⁷Awan panguloda, wenno ofisial a mangituray kadakuada,

⁸ngem agurnongda iti taraon iti kalgaw tapno adda kanenda iti tiempo ti tudtudo.

⁹Kasano ti kabayag ti panagidda ti sadut? Kaanonto ti ibabangonna?

¹⁰Kunana, “Maturogak lat' bassit, agdalikepkepak ket aginanaak iti mabiit.”

¹¹Ngem bayat ti pannaturogna, dumteng ti kinapanglaw a mangdarup kenkuana, a kas iti mannanakaw nga adda armasna.

¹²Agsursor a mamadpadakes dagiti awan serserbina ken nadangkes.

¹³Agkidday ken agseniasda a mangallilaw kenka.

¹⁴Ngem dakes ti pangpanggependa ket pataudenda ti riribuk iti sadinoman nga ayanda.

¹⁵Gapu iti daytoy, kellaat a madidigrada; masugatdanto iti nasaem a pakaigapuan ti ipapatayda.

¹⁶Pito a banag ti guraen ken saan a kayat ti Apo a maaramid: Natangsit a langa, naulbod a dila, ti mangpapatay iti awan basolna, ti agpanggep iti dakes, ti agdardaras a mapan agaramid iti maikaniwas, ti saksi nga agsao iti pasig nga ulbod, ken ti mangyeg iti pagapaan dagiti aggagayyem.

²⁰Anakko, tungpalem ti ibaga ni amam, ket dimo liplipatan ti isursuro ni inam.

²¹Imulam iti panunotmo ti saoda ket ipempenmo ida ita pusom.

²²Idalandakanto dagiti pannursuroda no agbiaheka; salaknibandaka iti rabii ket bagbagaandaka iti aldaw.

²³Mayarig iti naraniag a silaw dagiti pannursuroda; isurodaka nga agbiag.

²⁴Ilisinaka kadagiti dakes a babbai, kadagiti makagargari a sao ti asawa ti sabali.

²⁵Dika masulisog iti kinapintasda; dika paikulbo iti makagargari nga ikikitada.

²⁶Mabalin a gatad ti tinapay ti ibayad ti maysa a lalaki iti balangkantis ngem ti pannakikamalala ti mangpukaw iti amin nga adda kenkuana.

²⁷Mabalinmo aya nga awiten ti apuy iti barukongmo a saan a mauram ti badom?

²⁸Makapagnaka aya iti beggang a saan a masinit dagiti dapanmo?

²⁹Kasta ti kapeggad ti pannakikaidda iti asawa ti sabali. Agsagaba ti agaramid iti kasta.

³⁰Saan a mauyaw ti mannanakaw no takawenna ti kanenna a pamedpedna iti bisinna.

³¹Ngem no matiliwan, itedna ti mamimpito a gatad ti tinakawna—itedna amin nga adda kenkuana.

³²Ngem maag ti tao a makikamalala. Dadaelenna laeng ti bagina.

³³Maibabain ken makabil ket dinto mapunas ti pannakaibabainna.

³⁴Awan sabali a puon ti napalalo a pungtot ti maysa a lalaki no di ti panagimon; saan a mangngaasi no agibales.

³⁵Saanna nga awaten ti maibayad kenkuana. Uray mano ti isagutmo, di agbaaw ti pungtotna.