Read Iloko Ecclesiastes 10 Bible Online

Ecclesiastes 10 - Iloko bible

Ecclesiastes 10

¹Pagbuyoken dagiti natay a ngilaw ti sangabotelia a bangbanglo, ket ti bassit a kinanengneng pukawenna ti katan-okan a kinasirib.

²Gagangay a naimbag ti aramiden ti masirib. Gagangay met a killo ti aramid ti maag.

³Ti kinakuneng ti maag, madlaw uray dagiti ganggannaet a masabatna iti dalan. Ipakaammona iti tunggal maysa ti kinamaagna.

⁴No kaungetnaka ti agturay kenka, dika agikkat iti trabahom. Mabalin a mapakawan dagiti nadagsen a biddut no agulimekka.

⁵Adtoy ti nakitak a pannakailupitlupit ditoy lubong, pannakailupitlupit a pinataud dagiti agtuturay.

⁶Maisaad dagiti nengneng kadagiti nangato a pagrebbengan, ket awan ti mangbigbig kadagiti nabaknang.

⁷Adda dagiti tagabu a nakitak a nagsakay kadagiti kabalio idinto a kasla tagabu a magmagna dagiti natan-ok a tattao.

⁸No agkalika iti abut, matnagka iti abut. Serkem ti bakud ket kagatennaka ti uleg.

⁹No agtrabahoka iti pagkalian iti bato, madunorka iti bato. Agbalsigka ket masugatka iti panagbalsigmo.

¹⁰No namudel ti wasaymo ket dimo asaen, masapul a pigpigsaam ti panangusarmo. Nasaysayaat ti agplano nga umuna.

¹¹Awan ti serserbina nga ammom a paamoen ti uleg no ipalubosmo a kagatennaka nga umuna.

¹²Pakaidayawan ti masirib dagiti saona, ngem pakadadaelan ti maag dagiti balikasna.

¹³Irugina ti agsao iti minamaag ket gibusanna iti minamauyong.

¹⁴Sao a sao ti maag. Awan ti makaammo no ania ti sumaruno a mapasamak. Awan met ti makaibaga no anianto ti mapasamak kalpasan ti ipapataytayo.

¹⁵Ti laeng tao a nengneng a di makaammo iti dalanna nga agawid ti agtrabaho agingga a mapaksuyan.

¹⁶Agpeggad ti pagilian no agubing-ubing ti arina, ken pagay-ayat dagiti pangulona ti agramrambak iti agpatpatnag.

¹⁷Ngem nagasat ti pagilian no iturayan ti maysa nga ari a kabaelanna ti agdesision nga is-isuna ken addaan papangulo a mangan iti tumutop a tiempo, a makaigawid iti bagbagida ken saanda nga agbartek.

¹⁸No nasadut ti tao a mangtarimaan iti atep ti balayna, agtedted ti atep ket marpuog ti pagtaenganna.

¹⁹Pagragsakennaka ti panagrambak ket liwliwaennaka ti arak ngem dimo magun-od dagitoy no awan kuartam.

²⁰Dimo babalawen ti ari uray iti panunotmo laeng, ket dimo babalawen ti nabaknang uray iti uneg ti kuartom. Mabalin nga awiten ti tumatayab ti saom ket ibutaktakna ti imbagam.