Read Iloko Ecclesiastes 2 Bible Online

Ecclesiastes 2 - Iloko bible

Ecclesiastes 2

¹Inkeddengko a pagustoak ti bagik ket ammoek no ania ti ragsak. Ngem natakuatak nga uray daytoy awan serserbina.

²Nasarakak a kinamaag ti panagkatawa, ket awan imbag a maited kenka ti ragragsak.

³Gapu iti tarigagayko a sumirib, napanunotko ti agragsak babaen iti arak ket aglinglingayak. Impagarupko a daytoy ti kasayaatan nga aramiden dagiti tattao bayat ti ababa a panagbiagda ditoy daga.

⁴Naindaklan dagiti nagapuanak. Nangbangonak kadagiti balbalay nga agpaay kaniak ket nagmulaak iti ubas.

⁵Minulaak dagiti hardin ken minuyongan iti amin a kita ti agbunga a kayo.

⁶Nagkaliak kadagiti bubon a pangpadanumko kadakuada.

⁷Adu a tagabu ti ginatangko ket adda dagiti tagabu a nayanak iti balayko. Ad-adu ti pangen ken arbanko ngem ti siasinoman a nagnaed iti Jerusalem.

⁸Nagurnongak met iti pirak ken balitok a naggapu kadagiti pagiduldulinan ti gameng dagiti daga nga inturayak. Adu dagiti kumakanta a lallaki ken babbai a manglinglingay kaniak. Adda amin kaniak dagiti babbai a tarigagayan ti maysa a lalaki.

⁹Wen, natan-okak; natantan-okak ngem ti uray siasinoman a nagnaed iti Jerusalem. Pulos a dinak pinaay ti kinasiribko.

¹⁰Nagun-odko amin a tinarigagayak. Inaramidko ti amin a kinaykayatko a pagragsakan. Wen, impannakkelko amin nga inaramidko ket daytoy ti gunggonak.

¹¹Ngem idi ammirisek ti amin nga inaramidko ken no kasano ti rigatko a nagtrabaho, nabigbigko nga awan kaipapanan dagitoy. Mayarig iti panangkamkamat iti angin—awan serserbina.

¹²Ania pay koma ti mabalin nga aramiden ti maysa nga ari no di ti inar-aramid dagiti sinarunona a nagturay? Iti kasta, inrugik nga inutob ti kaipapanan ti agbalin a masirib, darasudos wenno maag.

¹³Ammok met ketdi a nasaysayaat ti kinasirib ngem ti kinamaag a kas iti lawag a nasaysayaat ngem iti sipnget.

¹⁴Ammo dagiti masirib ti pagturonganda, ngem dagiti maag saanda nga ammo ti pagbanaganda. Ngem ammok met a maymaysa ti pagtungpalantayo amin.

¹⁵Kinunak iti bagik, “Mapasamak met kaniak ti mapasamak kadagiti maag. Ania ngarud ti serserbi ti kinasiribko?” “Awan,” insungbatko. “Pulos nga awan.”

¹⁶Awan ti makalagip kadagiti masirib ken awan met ti makalagip kadagiti maag. Kadagiti umay nga aldaw, malipatandatayto. Masapul a mataytay amin, maag man wenno masirib.

¹⁷Ngarud, imbilangko nga awan serbi ti biag kaniak, agsipud ta awan sabali nga inyegna no di laeng panagsagaba. Awan serserbina ti amin; kinamkamatko ti angin.

¹⁸Awan ti kaipapanan kaniak ti amin nga inaramidko ken nagbambannogak agsipud ta ammok nga ibatikto iti sumukat kaniak.

¹⁹Nalabit a masirib wenno maag ti sumukat—siasino ti makaammo? Uray kasta, kukuananto amin a nagbambannogak, amin a nateggedak ditoy lubong gapu iti kinasiribko. Awan ti serserbina daytoy.

²⁰Ngarud, pagbabawiak dagiti amin a nagbannogak.

²¹Aramidem ti maysa a banag iti amin a kinasirib, pannakaammo ken kinalaingmo ngem kalpasanna, ibatimto a tawiden ti tao a di nagbannog. Awan serserbina daytoy ket saan a nainkalintegan!

²²Ania ti magunggona ti tao iti amin nga aramidna, pagbannogan ken panagagawana iti daytoy a lubong?

²³Amin nga aramidenna iti unos ti panagbiagna awan ti magunggonana no di saem ken ladingit. Uray iti rabii, saan nga agtalna ti panunotmo. Awan serserbina amin daytoy.

²⁴Awanen ti nasaysayaat nga aramiden ti maysa a tao no di mangan ken uminum ket nanamenna ti nagbambannoganna. Uray daytoy, nabigbigko nga agtaud iti Dios.

²⁵No awan ti Dios, kasano a maaddaanka iti taraon wenno mabalinmo ti agragsak?

²⁶Ikkan ti Dios iti sirib, ammo ken ragsak dagiti kaay-ayona, ngem pagtrabahoenna dagiti managbasol; mangged ken agsalimetmetda tapno maited ti matgedanda kadagiti kaay-ayona. Awan serserbina amin. Mayarig iti panangkamat iti angin.