Read Iloko Ecclesiastes 5 Bible Online

Ecclesiastes 5 - Iloko bible

Ecclesiastes 5

¹Agannadka no mapanka iti balay ti Dios. Inka sadiay tapno agsursuroka. Nasaysayaat dayta ngem ti agidatonka iti sakrifisio a kas kadagiti maag a di makailasin iti naimbag ken dakes.

²Panunotem nga umuna ti isaom ket dika agdarasudos nga agkari iti Dios. Adda ti Dios sadi langit ket addaka ditoy daga; isut' gapuna a dimo lablabsen ti panagsaom.

³No adu ti pakaringgoram, ad-adda nga agtagtagainepka iti dakes. No adu ti saom, ad-adda a makaisaoka iti minamaag.

⁴Ngarud, no adda ikarim iti Dios, dagdagusem a tungpalen. Saan a masapul ti Dios ti maysa a maag. Tungpalem ti inkarim nga aramiden.

⁵Dika la agkarkarin no dimo met tungpalen.

⁶Dimo ipalubos a dagiti bukodmo a sao ti pakaigapuan ti panagbasolmo. Saan a nasayaat nga ibagam iti imbaon ti Dios a nailaw-anka a nagkari. Apay a pagpungtotem ti Dios? Apay nga ikkam iti gundawayna a mangdadael iti amin a gapuanam?

⁷Iti laksid ti amin a tagtagainepmo, amin nga awan serserbina a trabaho ken adu a sao, masapul nga agbutengka latta iti Dios.

⁸Dika masdaaw no makitam nga idadanes ti gobierno dagiti napanglaw ket ipaidamna kadakuada ti hustisia ken dagiti kalinteganda. Salakniban ti tunggal agturay dagiti ofisiales iti babaenna; ket salakniban ida dagiti nangatngato nga agturay.

⁹Uray ti maysa nga ari agpannuray iti apit.

¹⁰No naagumka iti kuarta, awanto ti pannakapnekmo. No tarigagayam ti bumaknang, dimo maala amin a kayatmo. Awan serserbina.

¹¹No nabaknangka, ad-adu ti ngiwat a masapul a pakanem. Awan ti magunggonam no di laeng ti pannakaammom a nabaknangka.

¹²Mabalin nga adda wenno saan nga umanay ti taraon ti trabahador, ngem naimas ti turogna iti agpatnag. Ngem saan a makaturog ti baknang gapu iti panangpampanunotna iti adu a sanikuana.

¹³Adda nakitak a kinadakes ditoy lubong: Idulin dagiti tattao ti kuartada para iti tiempo a pannakasapulda;

¹⁴kalpasanna, mapukaw dayta iti saan a nasayaat a pannakainegosiona ket awan ti mabati nga ipatawidda kadagiti annakda.

¹⁵Awan intugottayo idi naipasngaytayo ditoy lubong ket awanto met maitugottayo inton mataytayo. Wen, lamolamotayonto a pumanaw nga awan maitugottayo kadagiti nagbannogantayo.

¹⁶Saan a nainkalintegan! Pumanawtayo a kas iti isasangpettayo. Agtrabahotayo, kayattayo a tiliwen ti angin ket ania ti maganabtayo?

¹⁷Agbiagtayo iti sipnget ken ladingit—mariribukan, makapungpungtot ket masaksakit.

¹⁸Adtoy ti natakuatak: ti kasayaatan nga aramiden ti tao isut' pannangan ken panaginum ket lak-amenna ti nagbannoganna bayat ti ababa a panagbiagna nga inted ti Dios. Daytoy ti gasat ti tao.

¹⁹No paraburan ti Dios ti maysa a tao iti kinabaknang ken sanikua ket ipalubosna a lak-amenna dagitoy, rumbeng nga agyaman ket lak-amenna ti nagbannoganna. Sagut ti Dios daytoy.

²⁰Gapu ta impalubos ti Dios nga agragsak ti tao, saanna a pakadanagan ti kaababa ti panagbiagna.