Read Iloko Ecclesiastes 6 Bible Online

Ecclesiastes 6 - Iloko bible

Ecclesiastes 6

¹Naimatangak iti daytoy a lubong ti maysa a kinadakes a bakbaklayen ti tao.

²Paraburan ti Dios ti tao iti sanikua, kinabaknang ken dayaw. Itedna amin a tarigagayanna. Ngem dina ipalubos a lak-amenna dagitoy, ta sabali a tao ti aglak-am. Awan serserbina daytoy ket saan a nainkalintegan.

³Uray no maaddaan ti tao iti sangagasut nga annak ken napaut ti panagbiagna, ngem awan met ti ragsakna, ken saan a nasayaat ti pannakaipumponna, kunak a naim-imbag ti kasasaad ti maysa a maladaga a natay a nayanak.

⁴Saan a pagimbagan dayta a maladaga ti pannakaipasngayna. Agpukaw iti kasipngetan ket sadiay malipatan.

⁵Dina makita ti lawag ti aldaw ket awan ammona maipapan iti biag. Ngem nasarakannan ti panaginana.

⁶Nasaysayaat ngem ti tao a saan a naragsak uray no agbiag iti dua ribu a tawen. Total, maymaysa a lugar ti pagtungpalanda.

⁷Aramiden ti maysa a tao ti amin a trabahona tapno adda laeng kanenna ngem awanto latta ti pannakapnekna.

⁸Kasano a nasaysayaat ti kasasaad ti masirib ngem ti maag? Ania ti imbag a lak-amen ti napanglaw no ammona a sarangten ti biag?

⁹Awan serserbina; mayarig iti panangkamat iti angin. Nasaysayaat a mapnekka iti adda kenka ngem ti kanayon nga agtarigagayka iti sabali a banag.

¹⁰Nabayagen a naikeddeng ti amin a mapasamak ket ammotayo amin a di kabaelan ti maysa a tao ti makisuppiat iti napigpigsa ngem isu.

¹¹No atiddog ti pannakisuppiatmo, ad-adda nga awan serbina. Awan imbag a maipaayna kenka.

¹²Kasano ti pannakaammo ti siasinoman no ania ti kasayaatan a banag nga agpaay iti maysa a tao iti daytoy ababa, awan serserbina a biagna—biag nga agpukaw a kas iti anniniwan? Siasino ti makaibaga no ania ti mapasamak iti lubong kalpasan ti ipapatayna?