Read Iloko Ecclesiastes 7 Bible Online

Ecclesiastes 7 - Iloko bible

Ecclesiastes 7

¹Naim-imbag ti nasayaat ti pakasarsaritaanna ngem ti nangina a bangbanglo. Nasaysayaat met ti aldaw a pannakataymo ngem ti aldaw a pannakayanakmo.

²Naim-imbag ti mapan iti balay nga adda agdudung-aw ngem ti mapan iti balay nga adda agrarambak agsipud ta masapul a laglagipen dagiti sibibiag nga ur-urayennatayo amin ni patay.

³Naim-imbag ti ladingit ngem ti katawa. Nalabit a palidayenna ti rupam ngem patademenna ti pannakaawatmo.

⁴Maag ti maysa a tao a kanayon a mangpampanunot iti maipapan iti ragsak. Maipapan iti patay ti pampanunoten ti masirib.

⁵Naim-imbag ti panangtubngar ti masirib kenka ngem ti panangdayaw kenka dagiti maag.

⁶Mayarig ti katawa dagiti maag iti panagrissik ti mapupuoran a siitsiitan a mula. Awan serserbi daytoy.

⁷No agkusit ti masirib, minamaag ti aramidna. No umawatka iti pasuksok, madadael ti katataom.

⁸Nasaysayaat ti panaggibus ti maysa a banag ngem ti panangrugina. Naim-imbag ti anus ngem ti kinatangsit.

⁹Tenglem ti pungtotmo. Kinamaag ti panagipempen iti gura.

¹⁰Dimo kunaen, “Apay a nasaysayaat nga adayo ti kasasaad idi un-unana?” Saan a nainsiriban daytoy a saludsod.

¹¹Masapul a masirib ti tunggal maysa nga agbiag. Naimbag a kas iti panangawat iti tawid

¹²ket ikkannaka iti talged a kas iti ipaay ti kuarta. Daytoy ti pagimbagan ti addaan sirib—salaknibannaka.

¹³Panunotem ti maipapan kadagiti inaramid ti Dios. Kasano a palintegem ti banag a kinillo ti Dios?

¹⁴No sumayaat ti kasasaadmo, agragsakka ket no dumteng ti pakariribukan, laglagipem daytoy: agtaud iti Dios ti ragsak ken riribuk. Dimo ammo no ania ti sumaruno a mapasamak.

¹⁵Awan mamaay ti panagbiagko, ngem iti daytoy, naimatangak ti amin. Mabalin a matay ti maysa a tao, ket at-atiddog ti biag ti sabali a tao uray no dakes.

¹⁶Dimo labsen ti kinaimbag wenno kinasiribmo. Apay a patayem ti bagim?

¹⁷Ngem dimo met palaloan ti agdakes wenno agmamaag. Apay a matayka a masapa?

¹⁸Dika unay aglablabes. No agdayaw ken agbutengka iti Dios, agballigika met laeng.

¹⁹Dakdakkel ti maited ti sirib iti maysa a tao ngem ti maited ti sangapulo a turayen iti maysa a siudad.

²⁰Awan nalinteg a tao ditoy daga a di agbiddut ken kanayon a naimbag ti aramidna.

²¹Dimo ikaskaso ti amin a sawen dagiti tattao, amangan no mangngegmo ti adipenmo a mangilunlunod kenka,

²²ket sika a mismo, ammom nga ilunlunodmo met dagiti sabsabali.

²³Inaramatko ti kinasiribko a mangusig amin kadagitoy. Imbagak iti bagik a masapul a sumiribak ngem diak kabaelan.

²⁴Siasino ti makaibaga iti kaipapanan ti biag? Saan a matukod, narigat a maawatan.

²⁵Ngem impamaysak a gun-oden iti pannakaammo ken panagadal. Inkeddengko a biroken ti kinasirib ken dagiti sungbat dagiti saludsodko ken ammoen ti kinadakes ken kinamaag ti kinanengneng.

²⁶Nasarakak ti nabilbileg ken nasasaem ngem patay—maysa a babai. Kasla iket ti ayatna a mangsilo kenka, kasla kawar ti imana a mangkayetket kenka. Malisian ti nalinteg a tao daytoy a babai, ngem tiliwen ti babai ti managbasol.

²⁷Wen, kinuna ti Mannursuro, nain-inut a naammoak daytoy bayat ti panangsapsapulko kadagiti sungbat dagiti saludsodko.

²⁸Nagsapsapulak pay iti dadduma a sungbat ngem awan nasarakak. Nasarakak ti maysa a lalaki iti tunggal sangaribu a mabalinko a raemen ngem awan ti uray maysa a babai.

²⁹Daytoy la ti naadalko: nalinteg ti tao a pinarsua ti Dios, ngem ti tao ti mangparnuay iti adu a parikutna.