Read Iloko Ecclesiastes 9 Bible Online

Ecclesiastes 9 - Iloko bible

Ecclesiastes 9

¹Nabayag ken napasnek ti panangpampanunotko iti maipapan amin kadagitoy ket naawatak nga adda iti pannakabalin ti Dios ti tignay ken aramid dagiti masirib ken nalinteg a tattao, uray ti ayat ken ti gurada. Awan ti makaammo iti uray ania a banag iti masangoananna.

²Awan ti pagdumaanna. Maymaysa ti panungpalan ti nalinteg ken ti managdakdakes, ti naimbag ken ti dakes, ti relihioso ken ti saan a relihioso, ti agidatag iti daton ken ti saan nga agidatag iti daton. Saan a nasaysayaat ti kasasaad ti naimbag a tao ngem ti managbasol. Saan a nasaysayaat ti kasasaad ti tao nga agsapata ngem ti saan nga agsapata.

³Padapada ti mapagteng ti amin ket biddut daytoy a kas iti aniaman a mapasamak ditoy lubong. Bayat ti panagbiag dagiti tattao, napno ti panunotda iti kinadakes ken kinamauyong ket pagammoan la ta matayda.

⁴Ngem adda namnama ti siasinoman a sibibiag iti lubong dagiti sibibiag. Nasaysayaat ti sibibiag nga aso ngem ti natay a leon.

⁵Wen, ammo dagiti sibibiag a mataydanto ngem awan ammo dagiti natay. Awanen ti nayon ti gunggonada; nalipatandan a namimpinsan.

⁶Idi natayda, natay metten dagiti ayatda, dagiti gurada, dagiti riknada. Saandan a makipartisipar iti aniaman a mapasamak ditoy lubong.

⁷Sige, manganka ket agragsakka. Uminumka iti arak ket aglinglingayka. Ipalubos daytoy ti Dios.

⁸Naisem ken naragsakka koma a kanayon.

⁹Nanamem ti biag iti sidong ti babai nga ay-ayatem, bayat ti panagbiagmo ditoy lubong, iti awan serserbina a biag nga inted kenka ti Dios. Aglang-ayka gapu ta dayta laeng ti magunggonam kadagiti pakaringgoram.

¹⁰Iti aniaman nga aramidmo, ipakatmo ti amin a kabaelam, gapu ta iti daga dagiti natay a papanam, dikanto agtrabaho wenno agpanunot ken awanto ti banag a pangusaram iti ammom wenno kinasiribmo.

¹¹Adda pay natakuatak: Iti daytoy a lubong, saan a kanayon a mangabak dagiti napardas nga agtaray ket saan met a kanayon a mangabak iti gubat dagiti natutured. Saan nga amin a masirib makabirok iti panggedanna. Saan nga amin a nasaririt bumaknang ket saan nga amin a makabael a tao maisaad iti nangato nga akem. Dumteng ti dakes a gasat iti tunggal maysa.

¹²Dimo ammo no kaanonto ti idadateng ti naituding a tiempom. Kas iti tumatayab a pagammoan la ta masiloan, kas iti ikan a matiliw iti iket, maipalab-ogtayo a ditay mapupuotan no dumteng ti dakes a tiempo.

¹³Adda pay sabali a nakitak a napintas a pagarigan no kasano ti pannakaibilang ti kinasirib ditoy lubong.

¹⁴Adda bassit nga ili a bassit ti agnaed. Dinarup ti maysa a mannakabalin nga ari. Linawlawna ti ili ket insaganana a rebbaen dagiti bakud a serkanna.

¹⁵Adda maysa a tao sadiay; napanglaw ngem masirib. Naisalakanna koma ti ili, ngem awan ti nakalagip kenkuana.

¹⁶Kanayon nga ibagbagak a nasaysayaat ti kinasirib ngem ti kinapigsa ngem awan ti mangipagarup a masirib ti maysa a napanglaw wenno mangikaso iti sawenna.

¹⁷Nasaysayaat a denggen dagiti naalumamay a balikas ti masirib ngem ti pukkaw ti maysa nga agturay iti taripnong dagiti maag.

¹⁸Ad-adu ti pagimbagan ti kinasirib ngem ti igam, ngem adu a kinaimbag ti mabalin a dadaelen ti maysa a biddut.